Opera zaleen elkartea Dagoeneko ez da albiste Zumarragako Zelai Arizti aretoak zuzeneko opera emanaldiak hartuko dituela. Albistea bada baina, Zumarragan eta Urretxun opera maite duten hainbat lagunek taldea sortu izana Zelai Ariztiko emanaldiei bultzada emateko. Londresko Royal Opera House operaren tenpluan egiten diren bost opera saio eskainiko dituzte Zumarragan apirilera bitartean.
Orain urtebete inguru Xabier Barriolak zenbait opera zaleekin kontaktua egin zuen. Orduan sortutako ideia zehaztu dute orain eta Zelai Ariztin egingo dituzten emanaldiak aurkezteko konpromisoa hartu dute. «Barriolak sarea ehundu du», diote aho batez musikarekin harreman profesionala edo afizionatua duten taldeko hainbat kidek.
Mikel Lizarralderen hitzetan, «guztiok gaude musikara lotuta eta gure lana, aurkezpenak egiteaz gain, opera emanaldiak beste kultur taldeetara zabaltzea da». Lizarralderekin batera Goierriko Hitzak jarritako hitzordura iritsitako opera zale bakoitzari genero horretatik zerk harrapatu zituen galdeginda, erantzun desberdinak eman ditu bakoitzak.
Zale bat, istorio bat
Lizarralde berak opera kanpotik baino lehenago barrutik ezagutu zuela kontatu du: «Vincenzo Belliniren Pirata operan parte hartu nuen Itsaso talde lirikoarekin eta ordutik harrapatuta nauka». Juan Carlos Alvarezek Bartzelonako (Katalunia) Liceo antzokian ikusitakoak ditu gogoan, «musika zaletasuna aitak transmititu zidan. Bartzelonan, Madrilen eta Bilbon ikusi ditut bertatik bertara, baita diskoetan entzun ere. Opera eguneratzearen aldekoa naiz, baina batzuetan sinbolikoegiak bihurtzen dituzte eta ulertzea zaila da». Amaia Urdangarinek musika bizimodu egin du. Piano irakaslea eta kantu ikasle afizionatua da. Urdangarinek zenbait musikaletan parte hartu du eta halako ikuskizunen atzealdeak gertutik ezagutu ditu berak ere. «Opera gero eta gehiago ezagutu, orduan eta gehiago harrapatzen zaitu». Karmele Iraeta ezagupenak bultzatuta baino, ezagutzeko gogoagatik egin da taldeko kidea.
Oro har, operak istorioak kontatzen duen gaitasuna azpimarratu dute, baita hunkitzeko duena ere. Lizarraldek dioenez,: «Aukera eman behar zaio, izan ere baliteke lehenengoarekin ez asmatzea eta operaren luzeak aspertzea. Asmatuz gero, ordea, inori ez zaio damutuko».
Opera lanak, oro har, zati ezberdinetan banatzen dira. Protagonistak eta bigarren mailako aktoreak agertzen dira taulan; antzinako antzerki grekoan bezala, korua bidelagun dute aktoreek, zeinak herritarren ahotsa-edo hartzen duen; orkestrak ere ezinbesteko pisua du, areago, hainbat operatan zentroan kokatzen da. Gaiek beti ukitzen dute gizakia zuzen zuzenean eta askotan drama gailendu egiten da. Arietara biltzen dira operetako unerik gorenenak, hala protagonisten bakarrizketak nola dramaren gailurrak.
Zumarragako emanaldiak Mozarten Figaroren ezkontzekin hasiko dira. Opera samurra da eta endredoz betea. Datorren astelehenean emango dute, Zumarra
