Carlos Mediavilla urretxuarrak bi argazki lehiaketa irabazi ditu: San Fermin eta Santa Anastasia jaietakoak.
Iruñako San Fermin jaietako argazki lehiaketa Diario de Navarra egunkariak eta Santander bankuak antolatzen dute. 1.000 argazki inguru aurkeztu dituzte eta lehen saria Mediavillak Goierriko Hitzan argitaratu zuen argazki batek eskuratu du.
Sari banaketa ekitaldia asteazkenean izan zen. Mediavilla oso pozik ageri da, nazioarteko lehiaketa hau irabazi duelako eta saria Migel Indurainek eman ziolako.
Urretxuko argazkilariak Santa Anastasia jaietako argazki lehiaketa ere irabazi du. Bigarren saria Jokin Antoñana urretxuarrak irabazi du, hirugarrena Josune San Sebastian urretxuarrak eta herriko bilduma onenari dagokiona Guillermo Murciegok.
Hamabi lagunek parte hartu dute. Guztiak Urretxu eta Zumarragakoak dira, eibartar ez ezik. Epaimahaia Jesus Udabe zumarragarrak eta Patxi Perez eta Mercedes Sayago getxotarrek osatu dute.
Sariak bihar banatuko dituzte, 19:00etan, Aizpurunea kultur etxean. Mediavillak 200 euro eta garaikurra jasoko ditu, Antoñanak 150 euro, San Sebastianek 125 euro eta Murciegok 100 euro eta garaikurra.
