Igandean Urretxuko Nekazaritza Ekologikoaren 7. Azoka egingo dute. Gernikako Arbola plazan izango da, 10:00etatik 14:30era. Azoka hau Urretxuko Udalak antolatu du, Biolur elkartearen laguntzarekin. Euskal Herriko hainbat ekoizleren produktuak egongo dira salgai. Besteak beste, barazkiak, barazki landareak, eztia, ogia, pintxo biologikoak, ardi gazta, sendabelarrak, ardoa, sagardoa, kontserbak, lore lehorrak, pastelak eta ukenduak jarriko dituzte salgai.
Goierritar askok parte hartuko dute. Tartean, hiru urretxuarrek: Aikur erleen museokoek eztia salduko dute, Asier Aldamak bere dendako produktuak salduko ditu eta Ilargikoek ogi ekologikoa. Gainera, Joseba Baez idiazabaldarrak behi gazta salduko du, Gorka Sasieta itsasoarrak haragia eta Mikel Lopez legorretarrak barazkiak.
Azokan erosketaren bat egiten duten guztiek produktu ekologikoen saskien zozketan parte hartuko dute. Horretaz guztiaz gain, haurrentzako tailerrak egongo dira. Tailer hauek elikagai ekologikoen ingurukoak izango dira.
