Datorren astelehenean, hilaren 12an, 80 urtetik gorakoen eguna ospatuko dute Urretxun. Ekitaldiak Aterpe erretiratuen elkarteak antolatu ditu eta festa elkartearen egoitzan bertan egingo dute. Hasteko, 14:00etan bazkaria egingo dute. Ondoren, bildutakoei opari txiki bat egingo diete. Bukatzeko, herriko jota taldeak abestuko du.
Festa hau aspalditik antolatzen dute eta arrakasta handia du herriko adinekoen artean. Izena emateko epea atzo amaitu zen eta atzo eguerdirako 85 bat lagunek emanda zuten izena. Santi Puertas Aterpeko presidenteak lehen festako zaharrena omentzen zutela, baina omenaldi hori egitarautik kendu zutela esan du. «Zaharrenari lore sorta bat ematen genion eta gainontzeko guztiak begira gelditzen ziren. Hori dela eta, guztiei oparitxo bat egitea erabaki genuen».
Bazkariari dagokionez, txupitoak arrakasta handia duela aipatu du. «Zizka-mizkek, azpizunak, tartak, izozkiak, kafeak eta txupitoak osatzen dute menua. Txupitoa denek hartzen dute. Hori kentzen baduzu…». Puertasek 11 urte daramatza Aterpeko zuzendaritzan eta kezkatuta ageri da. «Azkenaldian jende gutxiago etortzen da eta kezkatuta gaude. Jubilatuen etxea toki zoragarri batean dago, baina batzuek aldapa igotzea kostatzen zaiela esaten dute».
