Lantaldeko kideak Nerabeekin lanean aritzea da lantaldeko guztiak lotzen dituen ezaugarria. Guztiek, nola edo hala nerabeekin hartu emanak dituzte. Hain zuzen, ezaugarri komun horretatik eratu zuten 2011n diziplina askotariko profesionalak hartzen dituen lantaldea. Urretxuko eta Zumarragako nerabeekin egiten dute lan: irakasleak, hezitzaileak, osasun profesionalak, udaltzaingoa, ertzaintza, gizarte laguntzaileak eta osasun publikoaren ordezkariak dira. Lantaldea hilean behin biltzen da eta osatzen duten foroaren helburua da ahalik eta ikuspuntu gehien uztartzea. Zertarako? Nerabeen ongizateari bultzada emateko.
2011n hasitako ibilbidean ekintza asko burutu dituzte: gosari osasuntsuei buruzko tailerrak, lehen laguntzen ikastaroak, 16 urtekoei azterketa egiten die erizain batek, emaginarekin jardunaldiak, bizkarraren osasuna bermatzeko tailerrak… Ez dira baina, nerabeekin zuzenean egiten dituzten ekintzetara mugatzen.
Urretxuko eta Zumarragako nerabeentzako esku-hartze komunitario osasun arloko lantaldeak –izen hori jarri diote taldeari– taldekideen prestakuntza sustatzen du. Hirugarren hanka gurasoak dira eta haientzat ere prestakuntza saioak egiten dituzte.
Orain arte landutako gaietako batzuk honakoak dira: mendekotasunak –alkohola, tabakoa, bestelako drogak edo ludopatia–, emozioen kudeaketa, hezkuntza afektibo eta sexuala edota lehen laguntzak. Gai horietako asko jardunaldien bidez jorratu dituzte. Antolatuko duten hurrengo jardunaldian Interneteko arriskuen gaiari helduko dio Ertzaintzako informazio teknologiari lotutako delituen saileko agente batek. Hitzaldia irekia da eta edonor joan daiteke urriaren 27an Zelai Arizti aretora, 18:00etan.
Finean, nerabea bere osasunaren jabe egin dadin baliabideak sortu nahi dituzte. Bide batez, nerabeen beharrak zeintzuk diren identifikatu eta, esate baterako, gehienek bakarrik gosaltzen dutela jasotzen badute ikerketa batean, osasuntsu gosaltzeko giltzak zeintzuk diren agertzeko tailerrak antolatuko dituzte. Lehenengo nerabeei entzun, gero taldekideen ikuspuntuak uztartu eta gero, egin.
1.062
Nerabe
Urretxuko eta Zumarragako nerabe kopurua.
12-18 urte bitartekoak. Bi herriotako nerabeak edota bertan eskolatutako adin tarte horretakoak biltzen ditu kopuruak.
