Asteburu honetan Lurra dantza taldearen Garagardo Festa ospatuko da Urretxuko Ederrena pilotalekuan. Hiru berrikuntza nagusi daude: mus txapelketa antolatu dute, zuritoak edateko aukera egongo da eta artisau erara egindako garagardoak egongo dira.
Ostiralean eta igandean Ederrena pilotalekuko ateak 17:00etan irekiko dituzte. Larunbatean, berriz, 16:30ean. Izan ere, ordu horretan mus txapelketa hasiko da. Nahi duten guztiek parte har dezakete eta izen-emateekin jasotako diru guztia bikote onenen artean banatuko dute.
Garagardoei dagokienez, aurten 20 garagardo egongo dira. Horietatik sei, artisau erara egindakoak. Pitxarrez gain, zuritoak zerbitzatuko dituzte. Zurito bakoitzak 2,2 euro balioko du. Bost zurito edateko aukera emango duten txartelak ere salduko dituzte. Txartel hauek 10 euro balio dute.
Afaltzeko aukera ere egongo da. Iazko moduan, pizzak salduko dituzte. Baita halako festetan ohikoa den menua ere. Bi lagunentzako menuak 25 euro balio du eta ukondoa, purea, bi saltxitxa, bi postre eta bi pitxar garagardok osatzen dute. Urretxuko Lurra dantza taldeko lagunek musika eta pantaila erraldoia ere jarriko dituzte, festa girotzeko.
