Udako etenaldiaren ondoren, bere jardunari ekin dio berriro Zumarragako Musika Bandak. Etxeberri auzoko jaietan kontzertua eginda, Zelai Ariztiko oholtzara igoko dira igande eguerdian, beste emanaldi bat eskaintzeko. Berezia izango da, gainera, igandeko saioa, zuzendari gonbidatu batek gidatuko baitu kontzertua: taldeko kide den Gorka Azkaratek.
Azken urteetan zuzendari ikasketak egiten ari da Azkarate, eta «berarentzat kontzertu hau gidatzea aukera ona dela iritzita» egin diote eskaintza. Azkaratek 25 urte daramatza Zumarragako Musika Bandan. Emanaldia 13:00etan hasiko da eta programak egitura klasikoa izango duela aurreratu dute musika bandatik.
