Urretxuko osoko bilkuran edukiontzi grisak jartzea eta zaborraren tasa %25 igotzea onartu dute, EAJ eta PSE-EEren aldeko botoekin. EH Bilduk aurka bozkatu du eta Irabazi abstenitu egin da.
Errefusarentzako edukiontzi grisari dagokionez, berdearen ordez jarriko da. Itziar Agirre zinegotziak Sasietako zabortegia diru-iturri bat zela (beste mankomunitateei beraien zaborra uzteagatik kobratzen zitzaien) eta zabortegia ixteak diru-iturri hori bukatzea ekarri duela gogoratu zuen. Aurrerantzean udalek sortzen duten zabor kopuruaren arabera ordainduko dute eta edukiontzi grisarekin errefusa gutxiago sortzea espero dute. Gainera, berdea baino gutxiagotan hustuko da. 2016an kontzientziazio kanpainak egingo direla ere aurreratu zuen.
EH Bilduk gaia ez zela batzordetik pasa kritikatu zuen. “”Formak ez zaizkigu gustatu eta fondoa ez da nahikoa landu”, esan zuen Unai Badiolak. EAJkoek formak ez direla egokienak izan onartu zuten, baina datorren urtean urretxuarrek ahalik eta gutxien ordaintzea nahi bada, edukiontzi grisa lehenbailehen jarri behar dela esan zuten. Azken urteotan gai honi buruz askotan hitz egin dela gaineratu zuten.
Zabor bilketa sistema zein izango den erabaki ondoren, zaborraren tasa %25 igotzea erabaki zuten. “Sasietak %36ko igoera proposatu zigun, baina azken unean, edukiontzi grisa jartzen bagenuen, %25a igotzearekin nahikoa izango zela esan zuen. Igoera oso altua da, baina egoera dena da”, esan zuen Agirrek.
EH Bilduk igoera progresiboa defendatu zuen. Ordizian hala egingo dutela gogoratu zuen. Bestalde, 2016an udalak Fondo Foraletik gehiago kobratuko duela esan zuen eta diru hori erabiltzea proposatu zuen. Agirrek igoera progresiboa egiteko lehen urteetan udalak bere poltsikotik ordaindu behar duela aipatu zuen. “Bagenekien hau helduko zela, baina batzuei ez zitzaien komeni hauteskunde urtean tasa igotzea”.
Gainontzeko zerga eta tasa guztiak izoztu egin dituzte. Honetan, denak alde agertu ziren.
Herriko biktimen errekonozimendua bultzatzeko aitorpen instituzionala ere onartu zuten, EAJren, EH Bilduren eta Irabaziren botoekin. PSE-EEk aurka bozkatu zuen. Honen abiapuntua Jaurlaritzak alkateei egindako deialdia da. Bi urretxuar dira indarkeriak hildakoak: Jose Mari Etxaniz errefuxiatua eta German Gonzalez UGTko kidea. Jon Luqui alkateak gai honetan elkartzera deitu zituen alderdiak eta herritarrak.
PSE-EEko zinegotziek aurka bozkatu zuten. “Mozio hau ez dago adostuta. Zure ahalegina eskertzen dugu eta mingarria zaigu ezezkoa ematea”, esan zuen Javier Martinek.
EH Bilduko Oihane Zabaletak mozio honekin bizikidetza lantzeko lehen hazia jarri dela esan zuen. “Enpatia sortu behar dugu. Herrietan sortzen diren ekimenek inpaktu handiagoa dute, herritarrengandik gertuago baitaude. Gaur pauso garrantzitsu bat eman dugu eta ziur hurrengo lau urteetan gehiago emango ditugula”.
Luquik gai hau lantzen daramaten hilabete eta erdian guztien borondate ona nabaritu duela esan zuen eta PSE-EEko zinegotziei eman zizkien eskerrak, bereziki.
Osoko bilkuran Gurutze Santun babestutako etxebizitzak esleitzeko kudeaketari buruzko hirigintza-hitzarmena ere onartu zuten, EAJren, EH Bilduren eta PSE-EEren aldeko botoekin. Irabazik aurka bozkatu zuen, etxebizitza gehiago egitearen aurka dagoelako. Gurutze Santun (ikastolak hilerri ondoan duen lursailean) babes ofizialeko 53 etxebizitza egingo dira eta udala arduratuko da eskaera zerrenda osatzeaz eta, beharrezkoa balitz, zozketaz.
Bertan, promozio libreko 88 etxebizitza ere egingo dira. Honi guztiari esker, ikastolak bere eraikinaren berrikuntza hasi ahal izango du.
Bukatzeko, osoko bilkuran fracking-aren aurkako mozioa eta Askapenako kideak aske uztearen aldekoa ere onartu ziren. Fracking-aren aurkakoa denek onartu zuten. Askapenako kideen aldekoa EAJ, EH Bildu eta Irabazik onartu zuten. PSE-EEko zinegotziek ez zuten gaia eztabaidatu, epaitegietan dagoelako.
