Juan Mari Aldanondo urretxuarrak New Yorkeko maratoia egin zuen igandean. 6 ordu eta 29 minutu behar izan zituen, bere ametsetako bat betetzeko. Igande honetan Behobia-Donostia proban parte hartuko du eta ondoren Malagako maratoia egingo du.
Aldanondok proba «gogorra» izan zela dio. «Errepidea oso gaizki dago eta hori hankentzat oso txarra da». Gainera, kaleak amaigabeak dira. «Hiribideak eta zubiak ez ziren sekula bukatzen».
Giroa, berriz, «oso polita» dela dio. «Hura beste mundu bat da. Kalean jendetza zegoen, gu animatzen. Hemen ez al du inork lan egiten?, pentsatu nuen. Mundu guztia kalean zegoen».
Korrika egiteaz gain, saskibaloi partida bat ikustera joan zen. «New York Knicks eta San Antonio Spurs taldeen arteko partida ikusi nuen. Partida oso kaxkarra izan zen, New Yorkekoek oso gaizki jokatu baitzuten, baina Madison Square Garden pabilioia ezagutzeagatik bakarrik, merezi izan zuen».
Australia
Urretxuko korrikalariak dagoeneko munduko toki asko ezagutzen ditu atletismoari esker, urtero beteranoen munduko txapelketan parte hartzen baitu. Hurrengo edizioa Australian da eta, beharbada, joango da.
