Legazpi eta Zumarragako udalek kirol instalakuntzen inguruko hitzarmena berreskuratu dute. Hitzarmen hau joan zen legealdian hautsi zen. Dagoeneko, Legazpiko kiroldegiko bazkideek Zumarragako kiroldegia erabili dezakete eta alderantziz.
Legazpiko alkateak eta Zumarragakoak, Koldobike Olabidek eta Mikel Serranok, prentsaurrekoa eman zuten atzo Legazpiko Bikuña kiroldegian albistearen berri emateko.
Olabidek hitzarmena 1998an sinatu zela eta aurreko legealdian bertan behera gelditu zela gogoratu zuen. «Hitzarmena berritzeko pausoak ematen ari gara. Gure helburua bi herrietako biztanleek bi herrietako azpiegiturak erabili ahal izatea da. Datozen asteetan instalakuntzak zenbat erabiltzen diren aztertuko dugu, hitzarmena doitzeko. Legazpira Zumarragako zenbat jende etortzen den eta Zumarragara Legazpiko zenbat jende joaten den begiratu behar dugu. Hitzarmen berria 2016ko lehen hiruhilekoan sinatuko dugu».
Erabaki hau bi herrientzako ona izatea espero du. «Bi herrietako zerbitzuen erabilera bultzatzeko balio izatea eta bi herrientzako ona izatea espero dugu», esan zuen Olabidek.
Kirol arlotik kanpo ere elkarrekin lan egiteko asmoa dute. «Bi udaletako brigaden baliabideak partekatzeko ere lan egiten ari gara», aurreratu zuen Legazpiko alkateak.
Serranok Olabideren gonbita eskertu zuen. «Eskerrik asko Legazpiko kiroldegira gonbidatzeagatik. Gonbidapen honek karga sinboliko handia du eta bi udalen arteko harremana berreskuratzeko aurrerapauso garrantzitsua da. Hamalau urteko iraupena zuen akordioa alde bakar batek hautsi zuen eta haustura hura pairatu nuen. Sekula galdu behar ez genuena berreskuratzera goaz».
Legazpiko egungo alkatearen jarrera txalotu zuen. «Hasiera-hasieratik hitzarmena berreskuratzeko prest agertu da. Ez du inongo zerikusirik aurreko legealdian gertatu zenarekin», aipatu zuen.
Urretxuko Udalarekin ere antzerako hitzarmen bat sinatu nahi dutela aurreratu zuen. «Hitzarmenean Urretxu ere sartu nahi dugu», amaitu zuen Zumarragako alkateak.
1998ko hitzarmena 2012ko urtarrilean hautsi zuen Legazpiko Kirol Patronatuak, «Legazpira Zumarragako jende asko joaten zelako».
