Diabetesaren arazoa ez da zure medikuarena, zurea baizik: zu zara aktore nagusia». Horixe da Urgadiel Urola Garaiko Diabetikoen Elkarteak asteburuan gauzatuko duen kontzientziazio kanpainaren leloa. Izan ere, gaur gaurkoz, diabetesak ez du sendabiderik, baina bakoitzak bere burua zainduz gero, posible da gaixotasuna mendean izatea. Horretarako, ordea, gaixo bakoitzak bere burua zaintzeko ardura hartu behar duela uste du Urgadielek.
Diabetesaren nazioarteko eguna bihar den arren, Urgadielek etzirako antolatu du aurtengo informazio eta kontzientziazio kanpaina. Zazpi mahai jarriko dituzte Urretxun, Legazpin eta Zumarragan, 11:00etatik 13:00etara. Gluzemia probak egingo dituzte, eta, batez ere, informazioa banatu.
Angel Rico elkarteko presidentearen ustez, oso garrantzitsua da informatuta egotea, ondoren bakoitza bere gaixotasunaren jabe egiteko. «Gero eta informazio gehiago eduki, orduan eta tresna gehiago izango ditu diabetikoak bere gaixotasuna mendean izateko». Horrek, ordea, nork bere burua zaintzea eskatzen du: modu egokian jan, ariketa egin… Eta Ricoren esanetan, jendea ez dago nahikoa kontzientziatuta. «Gero eta gehiagok medikuaren esku uzten dute gaixotasuna; hark agindutako medikazioa hartu, eta kitto».
Gero eta bazkide gutxiago
Ricok, elkarteko presidentea den arren, ez du diabetesik. Miren Lopetegi idazkariak, ordea, bai, eta ongi baino hobeto daki nork bere burua zaintzeak duen garrantzia zenbaterainokoa den. Lopetegik azaldu duenez, diabetikoek itsuak geratzeko, bihotzekoak izateko… aukera handiagoak dituzte, eta aukera horiek areagotu egiten dira zaindu ezean.
Urgadiel Elkartea duela hogei urte baino gehiago sortu zen, eta bere jarduna ez da diabetesaren nazioarteko egunera mugatzen. Gaixoek beharrezko informazioa jaso dezaten, hainbat hitzaldi antolatzen dituzte urtean zehar, batez ere elikaduraren ingurukoak. Bestalde, Zelai Ariztin duten egoitza publikoari irekita izaten dute astean bitan, nahi duen guztiari informazioa emateko zein gluzemia probak egiteko.
Ricoren eta Lopetegiren ustez, garrantzi handia du elkarteak. Gero eta gutxiago dira, ordea: sorreran 110 bazkide ziren, orain 54. Ricoren esanetan, lan boluntarioa ez da balorean jartzen, eta erakundeek egin zain geratzen da jendea: «Baina diabetesa ez dauka lehendakariak, guk baizik, eta gure esku dago».
