Urretxu Zumarragako Karmakros Antzerki Tailerrak urtero prestatzen du antzezlanen bat urte amaierarako, herritarrei beren lana erakusteko asmoz. Aurten, A contracorriente antzezlana prestatzen ari dira. Abenduaren 18an taularatuko dute, Zumarragako Zelai Arizti aretoan, 22:30ean. Hamar egunen faltan, buru belarri ari dira entseguetan. Egunero elkartzen dira, Labeaga aretoan.
Patxi Remiro zuzendariaren hitzetan, Karmakrosen ibilbideko lanik «exigenteena» eta «zailena» da A contracorriente, interpretazioari dagokionean. Minbizia duen eta hiltzear dagoen gizon bat da antzezlaneko protagonista. Muturreko ideologia du, gaur egungo gizartean oso ongi ikusia ez dagoena. «Arrazista da, homofoboa, misoginoa…», azaldu du Remirok. Hau da, korrontearen aurka doa: A contracorriente.
Antzezlanak irauten duen ordubetean zehar, protagonistak barne bidaia bat egingo du bere pentsamenduan barrena. «Eta ikusleak dena ulertzen duela pentsatzen duenean… konturatuko da ez duela ezertxo ere ulertu». Izan ere, istorioak sorpresa bat duela aurreratu du Remirok, «ikusleak espero ez duen biraketa bat».
Karmakrosen helburua ikusleei zer pentsatua ematea da, hausnartzeko aukera eskaintzea. Horrez gain, mugak urratu nahi dituzte, eta ikusleak zirikatu. «Ikuslearengan sentsazio desatsegin bat sortu nahi dugu, deserosoa, eta eztarrian korapiloa dutela sentitzen badute, gure lana ondo egin dugunaren seinale izango da». Krisi garaian egonik, Remirok badaki jendeak barre egin nahi duela antzokian, eta eroso sentitu, eguneroko arazoak ahazteko. «Baina guk ez diegu hori eskainiko».
Taldekideek idatzi dute
Karmakros Antzerki Tailerreko lau antzezle igoko dira taula gainera abenduaren 18ko emanaldian: Patxi Remiro, Arantxa Azaldegi, Jean Olivo eta Gorka Zufiaurre. Besteetan baino formatu txikiagoa prestatzea erabaki dute, antolaketa errazagoa izateko. «Pertsona gutxiago izateak gastua, denbora, esfortzua… murrizten du».
Uztailaz geroztik ari dira antzezlana prestatzen. Taldekide guztien artean pentsatu zuten ideia, eta, irailaren amaierarako idatzita zuten gidoia. Entsaiatzen ari dira ordutik. Izan ere, antzezlan honekin «maila bat gorago» igo nahi dutela adierazi du Remirok. Harrera ona izaten badu, beste herri batzuetan ere egiteko prest agertu dira.
Sarrerak egunean bertan salduko dituzte, Zelai Arizti aretoko leihatilan, bost euroan. Lehiatila 22:00etan irekiko dute. Aurretik erreserbak ere egin daitezke, Karmakrosekoekin harremanetan jarrita, baina sarrera egunean jaso beharko da. Bestalde, antzerkirako urte osoko bonoa dutenek sarrera doan izango dute, baina ez zaie ohiko lekua erreserbatuko, zenbakitu gabeko sarrerak izango baitira.
