Laugarren urtez Made in Urola azoka egingo dute etzi, Zumarragako Euskadi plazan. Kontsumo lokala eta jasangarria bultzatzea da azokaren helburua, eta inguruko artisauek, artistek eta idazleek parte hartzen dute —Urretxu-Zumarragakoak, Legazpikoak, Ezkio-Itsasokoak eta Gabiriakoak –. 45 salmenta postu jarriko dituzte, eta 10:00etatik 15:00etara egongo da irekita.
Aurten, gainera, bi berritasun izango ditu azokak. Batetik, zuzeneko musika emanaldiak izango dira. Herriko hiru musika taldek joko dute: Gatazka, Alter Ego eta Isuo Sasiia. Musika eskolako txistulariek ere parte hartuko dute. Bestalde, Ametsa harategikoek txorizo egosi pintxoak salduko dituzte.
Haurrentzako tailerrak
Pare bat tailer ere izango dira, haurrentzat. Harea Haizea elkarteak haurrentzako makilaje tailerra egingo du, eta Irina Tartarovak postreak egiten irakatsiko die. Denetariko postuak jarriko dituzte: egurra, keramika, ilustrazioa, altzariak, bitxiak, arropa, kosmetika, gozoak… Zumarragako Aixa Vizuete idazlea ere bertan izango da, bere liburuak saltzen eta sinatzen. «Baldintza bakarra da norberak egindako gauzak izatea, eta ez erositakoak», azaldu du Maider Uli artisauak. Gabonetarako opariak erosteko aukera ona izango da.
Urtarrilaren 3an Legazpin egingo dute Made in Urola azoka, bigarren urtez.
