Euskaldunei abestea gustatu zaie beti, baina gazteen artean zaletasun honek ez du garai bateko indarrik. Hala, abesbatza askoren etorkizuna kolokan da. Urretxu eta Zumarragan ere hori ari da gertatzen. Zorionez, musika eskolak, Gainzuri ikastetxeak eta Urretxu-Zumarraga ikastolak indarrak batu dituzte gazteen artean kantu zaletasuna bultzatzeko. Haurrek beraien ikastetxean ematen dituzte lehen pausoak eta ondoren musika eskolan. Astelehenean egitasmo honetan parte hartzen ari direnek Urretxuko Tourseko San Martin elizan abestu zuten.
Astelehenekoa tailer-kontzertu bat izan zen: Urretxu eta Zumarragako haurrek Zaria koru eskolako Zariatxo abesbatzako kideekin abestu zuten. Izan ere, beti da aberasgarria esperientziak trukatzea eta norbera baino aurreratuago dagoen batengandik ikastea. Emanaldiaren lehen zatian Zariatxokoek zazpi kanta abestu zituzten eta bigarren zatian haur guztiek elkarrekin beste hiru kanta abestu zituzten. Kontzertua entzuleen gustukoa izan zen eta Zariatxokoen maila, eta Urretxu eta Zumarragako haurrek egindako aurrerapausoa txalotu zituzten.
Egitasmo honen bultzatzaileetako bat Xabier Barriola da. Barriolak urte asko daramatza musika munduan: Legazpiko musika eskolaren sortzaileetako bat izan zen, Urretxu eta Zumarragako Goiargi abesbatza zuzendu zuen eta hainbat abesbatzatan abestu du, besteak beste.
Bere ustez, abestea oso aberasgarria da eta gainera Goiargi abesbatzaren etorkizuna kolokan da. «Ez badugu ezer egiten, aurki Urretxu eta Zumarragan ez da mugimendu koralik egongo eta hori oso tristea da. Izan ere, ahotsa existitzen den instrumentu perfektuena da. Osoena. Sentimendu gehien azalarazten dituena. Baina horri ez diogu inongo baliorik ematen».
Hori ikusita, Gainzurikoek, ikastolakoek eta musika eskolakoek indarrak batzea erabaki zuten. «Gainzuritik eta ikastolatik bidaltzen ditugun haurrekin, hemendik urte batzuetara haurren abesbatza sortzea espero dugu. Astelehenean entzun genuen taldearen laurdena izatea lortuko bagenu, ez litzateke gutxi izango».
Gainzurikoak 35 bat haurrekin lan egiten ari dira, ikastolakoak 30ekin eta musika eskolakoak 13rekin. «Pixkanaka, taldea handitzen joatea espero dugu». Haurrei gonbita Barriolak Urretxu eta Zumarragako gurasoei eta seme-alabei gonbita luzatu die. «Ahalik eta erraztasun gehien eman nahi dugu eta egitasmo honetan parte hartzeko ez da derrigorrezkoa solfeoa jakitea». ZU abesbatzaren hurrengo emanaldia udaberrian izango da. Kontzertu horretan, Urretxu eta Zumarragako haurrek bakarrik abestuko dute.
