Urretxu-Zumarragako pilotazale guztiei pilotan jokatzeko aukera ematea da Beloki Pilota Kirol Elkartearen helburua: haurrei, federatu gabeei, 50 urtetik gorakoei… Helburu horren harira, III. Pilota Txapelketa Herrikoia antolatu dute. Urretxuko eta Zumarragako 24 bikotek eman dute izena, eta larunbatean jokatu zituzten lehenengo zazpi partidak.
Martxoaren 23an izango da finala, bi hilabete barru. Bitartean, larunbatero jokatuko dituzte kanporaketak, Beloki pilotalekuan, 09:00etatik aurrera. Sarrera doakoa da. Izan ere, pilotan jokatzen dutenei bakarrik ez, pilota ikustea gustuko dutenei ere eman nahi diete gozatzeko aukera. «Oso giro polita egoten da partidetan», adierazi du Iñigo Viana antolatzaileak.
Lehenengo faserako hiru talde osatu dituzte: pilotan ibilitakoak, ibili gabeak eta 50 urtetik gorakoak. Lehenengo partidetan maila berekoen aurka jokatuko dute. «Jokalariak eroso sentitzea nahi dugu, beren maila antzekoa duten lehiakideekin». Aurrera egiten duten heinean, ordea, beste maila batzuetako lehiakideak ere izango dituzte. Martxoaren 5ean jokatuko dituzte azken partidak, finalaren aurretik.
Hamasei urtetik 57 urte bitarteko pilotazaleek eman dute izena txapelketarako. Adinean bada aniztasuna, hortaz, baita bikoteen barruan ere. «Bikote batzuetan kide batek 50 urtetik gora ditu eta besteak hogei baino ez; kasu horietan 50 urtetik gorako taldean sartu ditugu», azaldu du Vianak.
Pilotari guztiak mutilak
Sexuari dagokionean, bestalde, ez da aniztasunik: jokalari guztiak mutilak dira. «Hirugarren urtea da txapelketa antolatzen duguna, eta inoiz ez du neska bakar batek izena eman, aukera baduten arren». Datozen edizioetarako neskak ere animatzea gustatuko litzaioke Beloki Pilota Kirol Elkarteari.
Eta, noski, txapelketa guztietan bezala, sariak ere izango dira. Martxoaren 23ko finalerako sailkatzen diren lau pilotariek trofeo bana jasoko dute. Bikote txapelduneko kideek, berriz, txapela jantziko dute. Horrez gain, Etxeberri jatetxean bi afari irabaziko dituzte: bikotekide bakoitzak afari bat.
