Zumarragako Arcelor Mittaleko langileak Donostiako Gipuzkoa plazan bildu dira gaur eguerdian, Foru Aldundiaren egoitza atarian, protesta egiteko. Langileen eta haien senideen artean, ehundik gora lagun elkartu dira, protesta zaratasuan. Bertan, «Arcelor, ez itxi!» bezalako oihuak egin dituzte; pankartetan berriz, «altzairurik gabe etorkizunik ez» edota «Mittal errudun» bezalako leloak irakur zitezkeen.
Eguerdian, Markel Olano ahaldun nagusiak harrera egin die enpresa batzordeko ordezkariei. Bileraren ondoren, haien eskakizunekin bat egin eta “babes osoa” eskaini die langileei; hala, “Zumarragako fabrika ez ixteko” exijitu dio ArcelorMittali. Foru Aldundiaren lana eta tresna guztiak erabiltzeko konpromisoa berretsi du, Zumarragako fabrikako lanpostuak gal ez daitezen eta ekonomia aktibitatea bertan mantendu dadin.
Ordubetetik gorako bilera egin dute langileekin. Ahaldun nagusiaz gain, Ainhoa Aizpuru Ekonomia Sustapena, Landa Ingurunea eta Lurraldeko Orekako foru diputatuak ere parte hartu du bileran.
Bilera, astelehenean
Donostiara abiatu aurretik, langileek asanblada egin dute gaur goizean, Beloki pilotalekuan. Hainbat egunez bilera non eta noiz egin adostu ezinda ibili eta gero, azkenean langileak eta enpresako zuzendaritza astelehenean biltzekotan gelditu dira, Donostian. Haiek esateko dutena “entzutera” joango direla azaldu dute batzordeko kideek.
