Urola Garaia BTT Maratoiaren laugarren edizioa egingo dute bihar. Urtero bezala, bi ibilbide egongo dira aukeran: bata 80 kilometrokoa eta bestea 40koa. Txirrindulariak Areizaga-Kalebarren plazatik irtengo dira, 08:30ean. Proba honek GOIERRIKO HITZAren laguntza du.
447 txirrindularik parte hartuko dute, iaz baino gehiagok. Ibilbide luzekoak Goierri garaiko lau mendi ezagunenetako gailurretatik pasako dira: Legazpiko Korosti (951 metro), Urretxuko Irimo (896 metro), Ezkio-Itsasoko Izazpi (967 metro) eta Zumarragako Beloki (651 metro). Ibilbide motzekoak Korosti eta Irimotik bakarrik pasako dira.
Ibilbide luzeak 3.200 metroko desnibel positiboa du eta motzak 1.800 metrokoa. Goierri kirol elkarteak antolatzen duen proba hori Goierriko gogorrena da. Ez bakarrik ibilbideen luzera eta desnibelagatik, baita kilometro asko bidexketatik egiten direlako ere. Gainera, bidexka asko lokaztuta egoten dira. Azken egunotan ez du euri asko egin, baina ostiralerako eta larunbaterako euria eman dute.
Antolatzaileek hiru aparkaleku jarriko dituzte parte hartzaileen eskura: La Salle-Legazpi ikastetxekoa eta lizeokoa autoentzat eta Gainzuriko saskibaloi pistakoa autokarabanentzat.
Bestalde, txirrindulariek bi herrietako kiroldegietan dutxatzeko aukera edukiko dute. Gainera, bizikletak garbitzeko toki bat egokituko dute.
Anoa postuak
Anoa postuei dagokienez, irten aurretik gosaria emango diete. Ibilbidean, berriz, hiru anoa postu egongo dira. Beraietan arazo mekanikoak konpontzeko laguntza eskainiko diete. Helmugan laugarren anoa postu bat egongo da.
Dortsalak Ederrena pilotalekuan jaso behar dira: bihar 10:00etatik 13:00etara eta 17:00etatik 20:00etara eta larunbatean 07:30etik 08:15era.
Mikel Beitia antolatzaileak dagoeneko dena prest dutela aipatu du. Urtero bezala, toki askotatik etorritako txirrindulariek parte hartuko dute. «Aurten, Leon, Burgos, Madril, Katalunia, Zaragozatik… etorriko da jendea».
Proba oso gogorra da eta horrek kanpotar asko erakartzen ditu. «Inguru honetako proba gogorrena da, bai luzera aldetik eta bai desnibel aldetik. Kanpotik etortzen direnek oso gogorra dela, baina mendiko bizikletaren izpiritua hori dela diote. Izan ere, beste proba batzuetan pistetan ibiltzen dira. Gurean, berriz, bidexketan gora eta behera ibili behar dira denbora guztian. Indarra eta abilezia behar dira».
Urola Garaia BTT Maratoiaren beste protagonistetako bat lokatza izaten da. «Ibilbidea primeran dago, baina euria egiten badu, lokatz asko egingo da», aurreratu du.
