Asteburu honetan Zumarragako 12. pintxo lehiaketa egingo dute. Iaz bezala, hamalau tabernak parte hartuko dute. Hauek dira aurtengo pintxo lehiaketan izena eman duten tabernak: Alaska, Alexander, Arkupe, Berri, Bidezar, Bordatxo, Hirukia, Iburreta, Kakueta, Monterrey, Txanpon, Xaloa, Zelaikoa Alkartetxea eta Ziaboga.
Taberna bakoitzak pintxo bat aurkeztuko du lehiaketara. Gainera, salgai jarriko du, euro batean. Lehiaketara aurkeztutako pintxoak ostiralean eta larunbatean dastatu ahal izango dira. Ostiralean 19:00etatik 21:00etara eta larunbatean 12:00etatik 14:00etara eta 19:00etatik 21:00etara.
Zumarragako Udalak bi pintxo lehiaketa antolatzen ditu urtero: bata ekainean eta bestea azaroko lehen asteburuan, Buzkantza Egunaren inguruan. Bigarren lehiaketa honetara buzkantzarekin egindako pintxoak aurkeztu behar dira. Asteburu honetako lehiaketan, berriz, ostalariek nahi duten osagaiak erabili ditzakete.
Epaimahaia Zumarragako hiru sukaldarik osatuko dute: Etxeberri jatetxeko Bixen Egigurenek, Kabia jatetxeko Juanma Hurtadok eta Ezkio-Itsasoko Argindegi ostatuko Josu Landak. Sari banaketa ekitaldia datorren asteko larunbatean izango da, Santa Isabel jaien barne. Sariak 11:15ean banatuko dituzte, plazan.
Iaz, Monterrey eta Alaska Iazko ekainean Monterrey tabernakoek irabazi zuten pintxo onenari dagokion saria. Pintxo originalenari dagokion saria, berriz, Alaska tabernakoek irabazi zuten. Saski taberna izan da orain arte lehiaketa honetan sari gehien lortu dituena.
