Zumarragako Udalak herriko gazteen autonomia eta emantzipazioa bultzatzeko diru-laguntzen oinarriak onartu ditu. Alderdi guztiek alde bozkatu dute.
Diru-laguntzak atzoko osoko bilkuran onartu zituzten. Udalak etxebizitza alokairurako eta autoenplegurako (proiektuaren gastuak, lokalaren alokairua, egokitze lanak…) laguntzak emango dizkie, baldintzak betetzen dituzten 18 eta 35 urte bitartekoei. Eskatzaileak Zumarragan erroldatuak egon behar dira.
Alokairurako laguntza jasotzeko, etxea Zumarragan egon behar da eta gaztea ez da etxe baten jabe izan behar. Bere soldata 28.000 eurotik beherakoa izan behar da eta etxe horretan bizi diren guztien soldaten batura 39.000tik beherakoa. Alokairua 600 eurotik gorakoa bada, ezin dute laguntzarik jaso. Zumarragako Udalak 20.000 euro aurreikusi ditu egitasmo honetarako eta diru-laguntzaren zenbatekoa alokairuaren prezioaren %50 izango da gehienez.
Autoenplegurako laguntzei dagokienez, negozioak Uggasaren bideragarritasun plana izan behar du eta egoitza Zumarragan egon behar da. Udalak 10.000 euroko aurrekontua aurreikusi du egitasmo honetarako. Laguntza proiektu, tasa, egokitzapen obra eta alokairu gastuen %50ekoa izango da gehienez.
