Gorka Hermosa akordeoilari urretxuarrak Munduko Akordeoi Konfederazioaren urteko abesti onenari saria irabazi du. Saria Portimao-n (Portugal) jaso du asteburuan. Northern lights da saritu duten abestiaren izenburua. Hermosak Lituanian konposatu zuen lan hau, ekainean. Bertan munduko herrialde askotako ikasleei eskolak eman zizkien (Korea, Norvegia, Mexiko, Zeelanda Berria, Ingalaterra…). Ez da Hermosaren lan batek jaso duen lehen saria. Izan ere, 2013an eta 2014an Unescoren saria jaso zuen. Bere lanak Amerikako Estatu Batuetan, Brasilen, Finlandian, Belgikan, Errumanian eta Espainian estreinatu dituzte, besteak beste. Gainera, film laburretarako eta La2 telebista kateko dokumentaletarako musika konposatu du. Bost disko argitaratu ditu eta beste 30etan parte hartu du. Munduko Akordeoi Konfederazioko presidentearen esanetan, Hermosa munduko lau akordeoi konpositore onenen artean dago.
