Gaur Ostadar Mendi Asteari hasiera emango diote, Club Vasco de Camping elkartearen erakusketa batekin. Argazkiak hilaren 27a bitartean Zumarragako kultur etxean egongo dira.
Lau emanaldi, haurrentzako mendiko argazkien rallyaren sari banaketa, batzar nagusia eta mendi irteera ere antolatu dituzte. Beroketa bezala, hilaren 6an Anjel Etxeberriaren omenezko haur ibilaldia egin zuten. Ostadarrekoek eskerrak eman nahi dizkiete udalei, Talleres Eitzari eta Gurutze Gorriari emandako laguntzagatik.
Aurtengo lehen bi ikus-entzunezkoak bi zumarragarrek eskainiko dituzte. Astelehenean Juan Mari Gabilondok Euskal Herriko mendiak lana emango du. Emanaldi hau Urretxuko kultur etxean izango da.
Asteartean, berriz, Mikel Diez zumarragarrak Khan Tengri: mendizaletasunaren hizkuntza emanaldia eskainiko du Zelai Arizti aretoan. Diez makina bat tokitan egon da: Alpeetan, Perun, Eslovenian, Kroazian, Marokon, Bolivian, Nepalen…
Iaz Kurgistango Khan Tengri mendia igotzen saiatu zen, Joseba Iztueta gabiriarrarekin batera. Eguraldia zela eta, ezin izan ziren gailurrera igo.
Asteazkenean Joxe Ramon Agirre Marronek Gashembrum II ikus-entzunezkoa emango du Urretxuko Labeaga aretoan. Emanaldiekin bukatzeko, ostiralean Javier Camachok Mountain dreams II eskainiko du, Zelai Arizti aretoan. Emanaldi guztiak 20:00etan hasiko dira.
Sari banaketa
Ostegunean, berriz, haurrentzako mendiko argazkien Ostadar rallyaren sari banaketa egingo dute. Ekitaldi hau Labeaga aretoan izango da, 20:00etan.
Azken bi ekitaldiak asteburuan izango dira. Larunbatean, bazkideen ohiko batzar nagusia egingo dute. 19:00etan izango da, elkartearen egoitzan: Zelai Arizti kultur etxean.
Bukatzeko, igandean Nafarroako Lokiz mendizerrara joango dira. Ondoren bazkaria egingo dute. Mendi irteera honetan parte hartu nahi dutenek elkartearen egoitzan (asteartea baino lehen) edo emanaldietan izena eman behar dute.
