Zumarragako jubilatuen etxeko zaharberritze lanak bide onetik doaz. Hilabete honetan bertan lehen fasea amaituko dute eta inaugurazioa sanjoanetan izango da, gutxi gorabehera.
Mikel Serrano alkateak bisita gidatua eskaini zuen atzo goizean. Altuna eta Uria enpresa «oso lan txukuna» egiten ari dela esan zuen eta herriko enpresa batzuk kontratatu dituela azpimarratu zuen. Lehen fasearen aurrekontua 850.000 eurokoa da eta diru hori Eusko Jaurlaritzak jarri du. Bigarren faseko aurrekontua ia 400.000 eurokoa da eta Udala diru hori lortzeko lan egiten ari da.
Eraikinak 1.000 metro koadro ditu eta goitik behera zaharberritzen ari dira. Plazako solairuan taberna eta 40 lagunentzako jatetxea jarri dituzte. Tabernak terraza ere izango du. «Orain arte taberna lehen solairuan zegoen eta bertara heltzea neketsua zen. Beste helburu bat bizilagunak jubilatuen egoitzara hurbiltzea da».
Taberna hau ustiatzen duenak El Salvador auzoko jubilatuen egoitzakoa ere ustiatu beharko du eta lehiaketaren oinarriak aurki emango dira eza- gutzera.
Beheko solairuan ile apaindegia, jubilatuen elkartearen bulegoak, bilera gela, komunak eta billarra egongo dira. Lehen solairuan, berriz, areto handi bat egongo da, jubilatuentzako taberna txiki batekin. Hitzaldiak egiteko, irakurtzeko, kartetan eta bingoan jokatzeko…
Bigarren solairua udalak erabiliko du bere beharretarako, baina jubilatuek ere erabili ahal izango dute beharra dutenean. Gelak modularrak izango dira.
Ganbara
Bukatzeko, ganbara gimnasia egiteko eta dantza taldearen eta abesbatzaren entseguetarako erabiliko dute. Udaltzaingoaren aldagelak ere bertan egongo dira. Aipatzekoa da, lehen ez bezala, igogailua ganbararaino helduko dela. Eskailerak metro eta erdiko zabalera izango du. Lehen metro eskasekoa zen.
Bestalde, ingurumena aintzat hartu dute: eraikina isolatu dute eta leiho guztiak aldatu dituztenez, lehen baino energia gutxiago beharko da berotzeko. Gainera, solairu bakoitza indibidualki berotu ahal izango da.
