Urretxuko udalbatzak Gurutze Santuko Babes Ofizialeko Etxebizitzen oinarriak onartu zituen atzoko osoko bilkuran. Izena eman nahi dutenek, Etxebiden izena eman behar dute lehenago. Urtarrilaren 15a baino lehen egin behar dute hori. Ondoren, lau hilabete izango dituzte etxebizitza eskatzeko. Etxebizitza Legean jasotzen den moduan, ez da zozketarik egongo: puntu gehien lortzen dituztenentzat izango dira etxebizitzak. Baldintza guztiak betetzen dituztenetatik 16k finantziazioa lortzen badute, promotoreak 22 etxebizitzako bloke bat egingo du.
Erkidegoan 2015eko abenduaren 1etik erroldatuta daudenek bakarrik eman ahal izango dute izena. Urretxun erroldatuta daudenek puntu gehiago lortuko dituzte, noski. Etxebizitzarik ez dutenek edo etxebizitza eduki arren baldintza hauek betetzen dituztenek eman ahal izango dute izena: etxea bizitzeko egokia ez izatea, irisgarria ez izatea edo txikia izatea.
Eskatzaileek urtean 9.000 euro irabazi behar dute gutxienez eta 39.000 gehienez. Genero indarkeriaren biktimek ez dute diru-sarrerarik aurkeztu behar izena emateko orduan eta urritasunen bat dutenek 3.000 euroko diru-sarrerarekin nahikoa dute izena emateko.
Zenbat eta diru gutxiago irabazi eta zenbat eta jende gehiago izan bizikidetza unitateak, orduan eta puntu gehiago lortuko dira. Seme-alabak dituzten unitate monoparentalek, etxebizitza erosteko aurrezki kontua dutenek, hipoteka duten banandutako pertsonek, alokairu publikoak dituztenek eta etxebizitza desegokiak dituztenek ere puntuak lortuko dituzte.
Abenduaren erdialdean bilera bat egongo da. Bertan, udalak eta promotoreak etxebizitzen eta izena emateko baldintzen berri emango dute. Bilerara nahi duten guztiak joan ahal izango dira.
Bestalde, Mutamu kolektibokoak osoko bilkurara joan ziren. Irailean Sarraldeko lokalak urez bete zirenetik musika taldek lokalik gabe daude. Alkateari zer egiten ari den jakin nahi zuten. Jon Luqui alkateak Zumarragak Udalarekin lan egiten ari direla esan zuen. Printzipioz, udalen asmoa Sarralden beste gune bat egokitzea da. 90.000 euro bideratuko dituzte horretara. Aurki Mutamukoekin bilduko dira egitasmo horretaz eta kudeaketaz hitz egiteko.
