2017a, 50. urteurrenen urtea da Urretxu eta Zumarragan. Izan ere, bi ikastetxek eta bi kultur taldek mende erdia ospatuko dute aurten: Urretxu-Zumarraga ikastolak, Joxe Mari Iparragirre institutuak, Irrintzi dantza taldeak eta Antxiñako Ama txistulari taldeak. Azken horiek logotipo lehiaketa batekin hasi dituzte ospakizunak.
Lehiaketa horren xedea txistulari taldearen irudia (ez urteurrenarena) izango den sormenezko diseinua hautatzea da. Edonork parte har dezake eta parte hartzaile bakoitzak bi lan aurkez ditzake asko jota.
Diseinuak taldearen izaera islatu behar du eta Antxiñako Ama txistulari taldea testua eraman behar du. Lanak martxoaren 1a baino lehen bidali behar dira Zumarragako kultur etxera.
Irabazlearen izena martxoaren 6an emango da ezagutzera. Egileak 300 euro jasoko ditu.
Txistulariek hainbat ekitaldi ere antolatu dituzte, 50. urteurrena ospatzeko. Apirilaren 4an Antxiñako Ama txistulari tal- deari eta Irrintzi dantza taldeari buruzko ipuina aurkeztuko dute. Ipuin hori Antxiñe Mendizabal idazleak eta Josu Maroto marrazkilariak egin dute.
Kalejira eta bazkaria
Maiatzaren 27rako, berriz, txistulariek kalejira eta bazkaria antolatu dituzte. Bi ekitaldi horietan taldeko beteranoek ere parte hartuko dute.
Zumarragako Santa Isabel jaietan ezpata-dantzari buruzko dokumental bat aurkeztuko dute. Dokumental honen ekoizpena Antxiñako Ama txistulari taldeak eta Irrintzi dantza tal-deak bultzatu dute.
Uztailaren 14an txistulariek eta dantzariek jaialdi bat egingo dute Zelai Arizti aretoan. Azkeneko ekitaldiak udazken amaieran izango dira. Azaro amaieran edo abendu hasieran argazki erakusketa bat egingo dute.
Abenduaren 3an, berriz, txistulari taldearen historia jasotzen duen liburua aurkeztuko dute. Ekitaldi horren ondoren txistu-poteoa egingo dute. Bukatzeko, abenduaren 16an txistu alardea egingo dute. Txistulariek urtero antolatzen dute alarde bat, baina aurtengoa berezia izango da, noski.
