Otsaila urteko hilerik gogorrenetakoa da haurrentzat eta beraien gurasoentzat: hotza eta euria nagusi dira eta haurrek ez dute nora joan. Zorionez, Urretxu eta Zumarragako udalek makina bat ekitaldi antolatu dute: euskarazko zine emanaldia, txotxongiloak, inauteriak… Aurten ez dira aspertuko!
Hasteko, joan zen igandean Balto pelikula eman zuten. Igande honetan, berriz, Rudy, txerri azkarra filma emango dute. Emanaldia Urretxuko Labeaga aretoan izango da, 17:00etan. Pelikula honetako protagonista txango batetik txerri batekin itzultzen den haurra da. Txerri horrek makina bat arazo sortuko du. Filmaren iraupena 90 minutukoa da eta, beti bezala, euro baten truke, haurrek zozketa batean parte hartuko dute.
Hilaren 19an, berriz, txotxongilo saio bat egongo da. Rosa Maria Martinez eta Lagunak taldeak Nahia eta Neo lana antzeztuko du. Lan horretako protagonista Nahia izeneko neskatoa da. Bere txakurrarekin eta espazioko izakiekin hamaika abentura biziko ditu. Txotxongilo saio hori Labeaga aretoan izango da, 17:00etan.
Sarrerak egunean bertan jarriko dituzte salgai, 5 euroan: 16:00etan, Labeaga aretoan. Pertsona bakoitzak lau sarrera eskuratu ahal izango ditu gehienez. Bestalde, Zelai Arizti kultur etxeko eta Urretxuko Udaleko Facebook-ean hiruna sarrera bikoitz zozkatuko dituzte.
Txotxongilo saio hori Urretxu eta Zumarragako haurrentzako antzerki egitarauaren barne antolatu dute. Martxoaren 19an Gorakada taldeak Titirikontu antzeztuko du, maiatzaren 7an Pirritx, Porrotx eta Marimototsek Tipi, tapa, Korrika!, urriaren 22an Markeliñek Kartoibiraka eta azaroaren 19an Anita Maravillasek Pintto, Pintto.
Emanaldi guztiak 17:00etan izango dira, Labeaga aretoan, pailazoena ez ezik. Horiek bi emanaldi eskainiko dituzte, 16:30ean eta 18:30ean Ederrena pilotalekuan.
Emanaldi guztietaz gozatzeko aukera ematen duten bonoak Urretxuko kultur etxean daude salgai. Haurrenak 20 euro balio du eta haurrari heldu batekin joateko aukera ematen dionak, 30. Bonoak hilaren 17a arte egongo dira kultur etxean. Hilaren 19an, 16:00etatik 17:00etara, Labeagan salduko dituzte.
Inauteriak
Hurrengo asteburuan haurrek inauteriez gozatzeko aukera edukiko dute. Ostiralean, otsailak 24, dantzaldia egongo da Zelai Arizti pilotalekuan. Eguraldi txarra egiten badu, Beloki pilotalekuan egingo dute. 16:30etik 19:30era izango da.
Larunbatean, 12:30ean, mozorro topaketa egongo da Iparragirre plazan. 17:30ean, berriz, musika eskolako ikasleek desfilea egingo dute. Inauteriekin bukatzeko, 18:00etatik 21:00etara dantzaldia eta mozorro lehiaketa egongo dira Gernikako Arbola plazan.
Otsailean haurrentzako tailer bat ere egongo da. 28an egingo dute, 17:00etan, Urretxuko liburutegian. Karetak egingo dituzte. Hilaren 20tik 24ra eman behar da izena, liburutegian.
