Joxe Mari Iparragirre institutuaren 50. urteurreneko ospakizun ekitaldi nagusiak larunbat honetan izango dira. 12:30ean ekitaldi instituzionala egingo dute Urretxuko Labeaga aretoan eta 14:30ean bazkaria egongo da Ederrena pilotalekuan.
Ekitaldi instituzionala gonbidatuei egingo dieten ongi etorriarekin hasiko da. Zuzendaritzaren agurraren ondoren, urteurreneko liburua aurkeztuko dute. Bertan, irakasle ohi batek ikastetxearen historia jaso du. Liburuan 60 irakasle eta ikasle ohiei egindako elkarrizketa laburrak, egungo ikasle eta irakasle guztien argazkiak eta hamar kolaborazio ere aurki daitezke.
Kolaborazio hauek Jose Luis Magro zuzendari ohiak, guraso elkarteak eta ikasle ohi batzuek egin dituzte: Carlos Rodriguezek, Pedro Berriotxoak, Mari Carmen Viedma eta Arantza Corralesek, Patricio Agirrek, Andoni Salamerok, Nerea Areizaga, Karen Alberdi, Maria Naranjo, Natalia Elvira, Nora Fernandez, Amaia Elias eta Nerea Egigurenek, Maialen Akizuk eta Marina Romonek. Liburua Ederrena pilotalekuko bazkarian salgai egongo da, 8 euroan.
Liburua aurkeztu ondoren, agintariei hitza emango diete. Cristina Uriarte Eusko Jaurlaritzako Hezkuntza sailburuak, Mikel Serrano Zumarragako alkateak eta Jon Albisua Urretxuko zinegotziak hitz egingo dute.
Hamabi omendu
Agintarien hitzen ondoren, Salamerok olerki batzuk errezitatuko ditu eta jubilatutako langileei omenaldia egingo diete. Hauek izango dira omenduak: Maritxu Ugalde biologiako irakaslea, Inocencio Fuentelsanz atezaina, Koro Badiola fisika eta kimikako irakaslea, Antonio Ayllon historiako irakaslea, Jose Manuel Oiarbide matematikako irakaslea, Rosa Rodriguez liburutegiko arduraduna, Juani de Miguel idazkaria, Julio Martin gaztelaniako eta literaturako irakaslea, Hilario Garcia biologiako irakaslea, Manu Albisu heziketa fisikoko irakaslea, Mila Garcia euskarako irakaslea eta Arantxa Fernandez gizarteko irakaslea. Mattin Aranburu eta Ainara Monterrubio ikasle ohiek dantzatuko diete aurreskua.
Bukatzeko, 20 ikaslek ikastetxeari buruz hitz egingo dute eta Goiargi abesbatzak hiru kanta abestuko ditu. Azken abestia Joxe Mari Iparragirreren Gernikako arbola izango da.
Taldeko argazkia atera ondoren, luntxa egongo da. 14:30ean, berriz, Ederrena pilotalekuan bazkaria egingo dute. 400 bat lagun elkartuko dira.
Lehenago, gaur eta bihar, beste bi ekitaldi egongo dira. Gaur, 19:30ean Urretxuko kultur etxean, Jose Luis Lafuente Osarteneko zuzendariak eta Miren Elgarresta aldundiko Berdintasun zuzendariak etorkizuneko lanbideei buruz hitz egingo dute. Bihar, 22:15ean, Cuando se tienen 17 años pelikula emango dute Zelai Arizti aretoan.
