Ostiraletik astelehenera bitartean San Isidro festak ospatuko dituzte Zumarragako Eitza auzoan, baina aurreko asteburu honetan ere hainbat ekitaldi egon dira: mus txapelketa, bigarren eskuko azoka eta Seat 600 kontzentrazioa.
Mus txapelketa larunbat arratsaldean jokatu zuten. 28 bikotek parte hartu zuten. Txapelketa Inixio Loiarte eta Inaziok irabazi zuten. Aitor Gago eta Joseba Rivasen aurka jokatu zuten finala. Igandean, berriz, bigarren eskuko azoka egon zen. Auzoko hamabi lagunek jarri zituzten postuak. Denetik erosteko aukera egon zen: arropa, jostailuak, liburuak, diskoak, kirol artikuluak… Jende asko gerturatu zen eta salmentak oso onak izan ziren.
Gainera, Zumarragako Udalak antolatutako Seat 600 kontzentrazioko parte hartzaileek Eitzan ordu beteko geldialdia egin zuten. Gaur giroa berotzen jarraituko dute. 19:00etan, auzoko Irrika elkartean Jose Francisco Benitez Txiskok gidatutako zuzeneko sukaldaritza saioa egingo dute.
