Urretxu eta Zumarragako Zintzo-Mintzo euskaltzale elkarteak bi ekitaldi antolatu ditu aste honetarako. Biek ala biek Zumarraga hobeto ezagutzeko balioko dute: ostegunean Antonio Pradak Zumarragarrak liburuari buruz hitz egingo du eta iganderako Argisao mendira irteera antolatu dute.
Solasaldia Zelai Arizti kultur etxean izango da, 18:30ean. Pradak urtarrilean aurkeztu zuen liburu hau. Bertan, erroldak oinarri hartuta, herriaren bilakaera aztertu du: biztanle kopuruarena, etxebizitza eta kale kopuruarena, genero eta adinarena, biztanleen egoera zibilarena, lan-jarduerena, herritarren jato- rriarena, prestakuntza akademikoarena eta euskararena.
Iganderako, berriz, Argisao mendira eta Elgarresta auzora irteera antolatu dute. Parte hartzaileak 08:00etan elkartuko dira Areizaga-Kalebarren plazan. Handik, Aparizio auzora joango dira. Ondoren, Matxain, Argisao, Korta eta Eitzaga bisitatuko dituzte. Gidari lanak Jonmikel Intsaustik egingo ditu.
Parte hartu nahi dutenek, izena eman behar dute. Horretarako, zintzo_mintzo@otamotz.eus helbide elektronikora idatzi behar dute.
Mendi ezezaguna
Igandeko irteera Argisao mendia ezagutzeko aukera paregabea izango da. Izan ere, mendi hau ez da oso ezaguna. Herritar gehienek Beloki eta Izazpira jotzen dute eta askoz ere gutxiago dira Legazpiko eta Gabiriako mugetatik gertu dagoen mendi honetara joateko ohitura dutenak.
Argisaora bidean, Urretxuko lantegi zaharrak, Mendiarasko gurutzea, Aparizio auzoa, Elgarrestamendi auzoa, Kaminpe fundizioa, Matxain zubia, Matxain etxaldea, Matxainerreka, eta Republika Lepoa bisitatuko dituzte, besteak beste. Argisaon, Argisaoko Santa Krutzen Batasuna gogoratuko dute. Batasun hau, Zumarraga, Ezkio eta Gabiriak osatu zuten XVII. mendean.
Herrira bidean, Goiko Txabolaz, ospitaleaz, Eitzako baselizaz eta Jira-Bira eskulturaz, Itziar eskulturaz, saskigileez eta Zumarragako trikitixaz hitz egingo dute.
