Urretxuko Udalak Urretxun Bizi Gara harrera eskolan matrikula egiteko epea ireki du. Ekimen hau beste kultura batzuetatik datozen adin nagusiko bizilagunei zuzendua dago. Urretxuko eta Goierri garaiko gizartearen, historiaren eta baliabideen ezagutza handiagoa izan nahi dutenei, alegia.
Laugarren edizio honetako saioak asteartetan eta ostiraletan izango dira:?09:30etik 11:45 era, Aizpurunea kultur etxean. Lehen saioa urriaren 3an izango da eta azkena abenduaren 22an egingo dute. Parte hartzaileek 36 eskola ordu jasoko dituzte, guztiz doan. Hitzaldi, txango, tailer eta bisita gidatuetan parte hartuko dute, besteak beste. Aurrekoetan bezala, teknikariek, eragileek eta herriko erakunde eta elkarteetako ordezkariek eman dizkiete azalpenak. Ikasleek historia, gizartea, kultura, enplegua, etxebizitza, hezkuntza, hizkuntza, osasuna… izango dituzte hizpide.
Gainera, lehen aldiz, nahi duten guztiek egonaldia egin ahal izango dute herriko kultur elkarteren batean. Egonaldi hauek bost astekoak izango dira. Egonaldien helburua elkarrekiko ezagutza sustatzea eta harrera eta egokitzapen prozesuak erraztea da.
Egitasmo honetan parte hartu nahi dutenek Urretxuko udaletxeko Gizarte Zerbitzuetako bulegora jo behar dute. Irailaren 26a da horretarako azken eguna. Argibide gehiago nahi dutenek ere bertara jo dezakete edo 943 03 80 80 telefono zenbakira deitu.
Ekimen hau 2014an jarri zen martxan eta ordutik 36 bizilagun pasa dira harrera eskolatik. Urretxun Bizi Gara 2009ko Inmigrazio eta Bizikidetza planaren barruan kokatzen da. Helburua Urretxu osatzen duten kulturen arteko aberastasuna bultzatzea eta topaketarako gune bat eraikitzea da. Aniztasun eta Bizikidetza Mahaiaren babesa du. Batzorde hau herritarren parte hartzeari irekita dago eta, besteak beste, kulturen arteko azoka antolatzen du.
