Gorka Hermosa urretxuarra munduko akordeoilari ospetsuenetako bat da. Azaroaren erdialdean Txinan egon da. Beijing-eko Kontserbatorio Nagusian eskolak eman ditu, ikasle onenek bere konposizioak jo dituzte eta Txinako Telebista Nazionalerako elkarrizketa egin diote.
Hermosa Beijing-eko Kontserbatorio Nagusiak gonbidatuta joan da Txinara. Kontserbatorio hau punta-puntakoa da. Bertatik, munduko musikari onenetako batzuk pasa dira. Placido Domingo, Mstislav Rostropovich, Yehudi Menuhin, Zubin Mehta eta Luciano Pavarotti, besteak beste.
Kontuan izan behar da azken urte hauetan Txinako akordeoilariek irabazi dituztela munduko lehiaketa garrantzitsuenak. Hermosaren konposizioak jo dituzten ikasleek lehiaketa horietako batzuk irabazi dituzte.
Horietako batek, Tian Jianan-ek, urretxuarrak bidaia honetarako konposatu duen The great wall kanta jo zuen. Abesti honetan Txinako Harresi Handia lehenengoz bisitatu zuenean sentitu zuena islatu du.
Datorren abuztuan berriro bisitatzeko aukera edukiko du, txinatarrek hirugarrengoz gonbidatu baitute.
Txinatarrek Hermosa mirestea ez da harritzekoa, ibilbide paregabea osatzen ari baita. Nazioarteko hainbat lehiaketa irabazi ditu eta bera izan zen Espainiako orkestra batekin bakarlari gisa jo zuen lehen akordeoilaria. Bere kantak mundu osoko orkestrek estreinatu dituzte eta ikasle askok bere lanak jotzen dituzte kontzertu, lehiaketa eta azterketetan.
Urretxuarrak musika mota ia guztiak jotzen ditu: klasikoa, modernoa, jazza, flamenkoa, euskal musika… Horretaz gain, film laburretarako eta dokumentaletarako musika konposatu du, 30 disko baino gehiagotan parte hartu du eta lau liburu argitaratu ditu.
Kanta onenari saria
2016an, akordeoiarekin jotzeko konposizio onenari saria eman zioten eta musikari oso ezagunekin jo du: Ara Malikian, Iñaki Salvador, Jose Luis Monton, Paquito D’Rivera… Egun, akordeoi irakaslea da Santanderreko Jesus de Monasterio kontserbato- rioan.
Datozen hilabeteetan, besteak beste Estatu Batuetan, Kanadan, Mexikon, Polonian, Txekian eta Hungarian joko du Urretxuko akordeolariak.
