Andoni Salamero zumarragarrak autoestimu eta motibazioari buruzko hitzaldia emango du eta helduaroari nola aurre egin azalduko du. Ekitaldia Urretxuko kultur etxean izango da, gaur 16:00etan.
Hitzaldia Mairi emakumeen elkarteak antolatu du. «Mairi-koak nirekin harremanetan jarri ziren eta beti ondo hartu nautenez, baiezkoa eman nien. Iaz bioberatasunari buruz hitz egin nuen eta aurten autoestimuari buruz hitz egingo dut. Elkarteko gehienak erdaldunak direnez, gazteleraz hitz egingo dut», azaldu du.
Autoestimua oso garrantzitsua dela azaldu du. «Gure buruari buruz dugun iritziaren arabera, autoestimu gehiago edo gutxiago dugu. Autoestimu gutxi badugu, gure bizitza txikitu egingo dugu».
Beldurrak autoestimua gutxitzen duela gehitu du. «Mundua maitasunak eta beldurrak gidatzen dute. Egun, beldurraren aldeko kanpaina dago. Industria farmazeutikoari, agintariei… gu beldurtuta egotea komeni zaie. Albiste ezkorrak zabaltzen dituzte gu beldurtzeko».
Eta beldurrak gizakiak mintzen ditu. «Beldurra dela eta, adinekoek ez dute etorkizuna argi ikusten. Baina egun inoiz baino aukera gehiago dituzte ikasteko, trebatzeko… Gainera, bizitza itxaropena hazi egin da».
Beldurrari aurre egiteko eta autoestimua eta motibazioa hobetzeko onena sormena lantzea dela dio. «Norberak bere gaitasunak bilatu behar ditu. Gizarteari zer eskaini diezaiokeen aztertu behar du. Indarguneak hartu behar dira kontuan eta ez ahulguneak. Jendeari itxaropena landu behar dela azaldu nahi diot», amaitu du.
