Donostian bizi den Marijose Cueli errenteriarrak Ezinezko munduak argazki erakusketa ireki du Urretxuko Juan de Lizarazu aretoan. Cuelik ezinezko munduak direla dio, baina existitzen dira: bere begiekin ikusten ditu eta bere kamerarekin harrapatu.
Cueliri beti gustatu zaio argazkigintza, baina duela lau urte ekin zion serio. «Nire ahalmenetik kanpo zegoen zerbait zela uste nuen, baina Gipuzkoako Argazkilari Elkartearen berri izan nuenean, bertara joan nintzen. Telefonoarekin eta app batzuekin nolako argazkiak egin daitezkeen ikusita, kamera on batekin eta Photoshop-ekin sekulakoak egin ahal izango direla pentsatu nuen. Ikastaro bat egin nuen eta gogo handiz ekin nion. Youtube-ren bidez ere asko ikasi dut».
Argazki bereziak
Bere argazkiak oso bereziak dira. «Irteeretan asko gozatzen dut. Ez ditut ohiko paisaiak ateratzen. Argazkiak iradokitzaileak izatea gustatzen zait. Naturan aurkitzen ditudan gauzek niri iradokitzen didatena ikusleei iradokitzen saiatzen naiz. Jendeak argazkiak zer iradoki dien esaten didanean, argazkia atera nuenean bizitakoa berriro bizitzen dut».
Ostiralean Urretxun erakusketa ireki zuen eta urretxuarren iritzia jasotzeko aukera eduki zuen. «Jendeak argazkiak harrigarriak direla esan zidan. Ez zirela arruntak. Basajaunen argazkia asko maite dut. Izan ere, gure pertsonaia bat da», aipatu du Donostian bizi den argazkilari errenteriarrak.
Cuelik Carlos Mediavilla argazkilari urretxuarraren eskutik ekarri ditu bere lanak Urretxura. Mediavillari asko gustatzen zaizkio Cueliren lanak. «Argazkien bitartez bere istorioak kontatzen ditu. Denoi gustatzen zaigu gure istorioak kontatzea, baina bere argazkiak ez dira arruntak. Harago joan da. Bere istorioak oso gustu onarekin kontatzen ditu eta oso lan pertsonala da. Ezin da gainontzekoek egiten dutenarekin konparatu. Basoan sartzen da eta basoak iradokitzen diona argazkietan jasotzen du», azaldu du Urretxuko argazkilari beteranoak.
Cueliren argazkiak martxoaren 3ra arte egongo dira Urretxun. Juan de Lizarazu erakusketa aretoa asteartetik igandera irekitzen dute, 17:30etik 20:30era.
