Eusko Jaurlaritzak lizentziarik ez duten tabernetako kultur eskaintza urtean hamabi emanalditara mugatuko duen lege proposamena egin du. Arteak Ireki plataformak mobilizatzeko deialdia egin du eta Urretxu eta Zumarragako musikariek ekitaldi bat antolatu dute biharko (ostirala). Urretxuko Iparragirre plazan izango da, 20:00etan. Kontzentrazioa egingo dute eta ondoren komunikatu bat irakurriko dute.
Urretxu eta Zumarragako Kale Gorrian, Zarraparra, Mutamu, Hezurre Eskifaia eta gaztetxeak komunikatu bat adostu dute. Herrian dagoen musika eskaintza kontuan hartzeko eskatu dute. «Taldeen lana, entsegu orduak eta lokalik gabe egon diren urte guztiak baloratzeko eta emanaldiak emateko dituzten arazo guztiei irtenbide bat emateko garaia da».
Ez direla papurrekin konformatuko diote. «Orain da borrokatzeko garaia. Gure deialdia zabaltzen diegu kultur eragile, alderdi politiko, musika mugimendu eta talde guztiei eta norbanakoei, indarrak batzeko eta ahalik eta presio gehien egiteko. Hala nola, gure prestutasun osoa adierazten dugu arazo honi irtenbide justu bat bilatzeko».
Taberna batzuek egin duten kultur eskaintza «oso positiboki» baloratzen dute. «Babes legalik gabe, oztopo askorekin, isunekin eta azken urteetako krisi ekonomikoaren gainetik ibili dira».
Lege proposamenak emanaldi guztiak mugatzen dituela gogoratzen dute. «Ez ditu 90 dezibelioetatik pasatzen direnak soilik mugatzen. Kultur eragile guztien kontrako eraso bat da eta denon inplikazioa ezinbestekoa da. Bertsoak, antzerkia… ekimen kultural oro mugatu nahi dute».
Emanaldiak mugatzeari ez diote zentzurik ikusten. «Ez dugu uste hamabi emanalditara mugatzea irtenbidea denik. Beste toki batzuetan zenbakiak beste batzuk dira. Emanaldiak hamabira mugatzea eraso zuzen bat iruditzen zaigu. Nor da gai, nork du zilegitasuna, honi zenbaki bat jartzeko?».
Hori dela eta, alderdi politikoei, erakundeei, erregulatzeko eskatzen diete. «Eragile politikoei ardura eta zentzua eskatzen diegu. Gaia errotik heldu dezatela eta araudi bat egin», amaitu dute.
