Eusko Jaurlaritzak babes ofizialeko 24 etxebizitza eraiki behar ditu Urretxuko Lilibaso kalean. Horietako 20 alokairu sozialekoak izango dira, gazteentzat. Beste lauak udalari utziko dizkio, larrialdi egoeretarako. Obra urtea amaitu aurretik astea espero dute.
Eusko Jaurlaritzako Etxebizitza zuzendaria, Pablo Garcia Astrain, Urretxun egon zen ostiralean. Etxebizitzen lursaila bisitatu zuen, Jon Luqui alkatearekin eta Nati Nieves zinegotziarekin.
Luquik lursaila udalarena dela esan zuen. «Orain arte hemen egin dugun gauza bakarra mendia eustea da. Jaurlaritzari gazteentzako etxebizitzak egitea proposatu genion eta honek begi honez ikusi zuen proposamena. Aurrekontua bi milioi ingurukoa izango da. 600.000 euro mendia botatzeko erabiliko dira. Proiektu hau jaurlaritzak bakarrik atera dezake aurrera. Hori dela eta, Pablori eskerrak eman nahi dizkiot».
Garcia Astrainek 20 etxebizitzak Alokabidek kudeatuko dituela esan zuen. «Dagoeneko 65.000 lagun baino gehiagok eman dute izena Alokabiden. Etxebizitza Planak pisuak eskaintzera behartzen gaitu eta urtero 450 inguru eskaini nahi ditugu. Horretarako, udalen laguntza behar dugu. Hori dela eta, Urretxuko Udalari eskerrak eman nahi dizkiot lurzoru hau utzi digulako».
Nievesek urretxuar talde batek alokairu sozialeko etxeak eskatu dituela gogoratu zuen. Hori dela eta, Luquiri eta Garcia Astraini eskerrak eman zizkien egindako lanagatik. Izan ere, udalak eta jaurlaritzak urtebete inguru daramate egitasmo honetan lanean.
