Urretxuko Udalak San Martineko haur parkean jolas berriak jarriko ditu eta Belaustegi plazako gaztelua berrituko du. San Martineko parke estalian jarriko diren jolasetako batzuk inklusiboak izango dira.
San Martineko parke estaliko lanak aste honetan hasi dira. Egungo jolasak kendu eta berriak jarriko dira. Jolas berrietako batzuk inklusiboak izango dira. Hala, aniztasun funtzionala duten haurrek ere parkea erabili ahal izango dute. Parke hau urte guztian da erabilgarria, gainera, estaldura baitu.
Sei jolas jarriko dira. Horietako hiru haur guztiek erabili ahal izango dituzte:?gurpildun aulkia duten haurrek erabili dezaketen errotazio jolasa, segurtasun uhala izango duen zabua eta Jeep bat. Beste hiruak, txirrista, tunela eta irristatzeko barra izango dira.
Jolas gune berriak 140 metro koadro inguru izango ditu. Oraingoa baino handiagoa izango da, beraz. Hori dela eta, segurtasun zorua ere orain arte baino handiagoa izango da. Segurtasun zoru horrek araudi berria beteko du. Jolas horiez guztiez gain, ping-pong mahai bat jarri behar dute. Lanak egun gutxi barru bukatzea espero dute. Aurrekontua 34.000 eurokoa da.
Gazteluaren konponketa
Urretxuko Udalak, San Martineko parkean jolas berriak jartzeaz gain, Belaustegi plazako parkeko gaztelua konpondu behar du. Udalak plangintza bat prestatu du gaztelua berritzeko. Iaz gazteluaren egurrezko zoruak aldatu zituen eta orain elementu bertikalak aldatuko ditu:?balkoiak, dorreak…
Mantentze lanak etengabeak dira, baina zaharberritzea beharrezkoa ikusi da, haurren segurtasuna bermatu ahal izateko.
Lanak martxoan zehar egingo dira eta, hala, udaberritik aurrera herriko haurrek berriro beraien jolas kuttunaz gozatu ahal izango dute.
Obrak dirauen bitartean ezingo da gazteluan jolastu. Horretarako, hesiak jarriko dituzte. Udalak aldez aurretik barkamena eskatu du sortuko diren eragozpenengatik.
Gazteluaren elementu bertikalen aldaketaren aurrekontua 15.000 eurokoa da. Egurrezko zorua aldatzea, berriz, 6.000 euro kosta zen.
Ez da harritzekoa udalak gaztelua ondo zaintzea, herriko haurren jolas kuttuna baita. 2007an jarri zen eta hasieratik sekulako arrakasta izan zuen. Asko erabiltzen ez zen parke bat herriko parke erabilienetako bat bihurtu zen gazteluari esker. Hala, jende askok Belaustegi plazari gazteluaren plaza deitzen dio. Jolas erraldoi hau 120.000 euro kosta zitzaion Urretxuko Udalari.
