Urretxun eta Zumarragan festa bat antolatu dute Korrika herritik pasako den egunerako. Hamaiketakoa, magia saioa, poteo girotua, bazkaria eta musika saioa egongo dira.
Korrikaren 21. edizioa apirilaren 13an iritsiko da Urretxura eta Zumarragara. 10:00etan sartuko da herrian, Eitzatik. Urretxu eta Zumarragako kaleak zeharkatu ondoren, Legazpira joango da.
Urretxuarrek eta zumarragarrek, korrika egin ondoren, hamaiketakoa egingo dute. Areizaga-Kalebarren plazan izango da. Ondoren, 12:00etan, Txan Magoak magia saioa egingo du toki berean eta poteo musikatua egongo da. 14:30ean, berriz, herri bazkaria egingo dute Urretxuko Gernikako Arbola plazan. Bukatzeko, 16:00etan, bazkaloste musikatua egongo da.
Bazkariko txartelak Motz, Apatxe, Osaba, Krak, Zona Zero eta Ziaboga tabernetan jarri dira salgai. Haurrentzako menuak (makarroiak, solomoa eta postrea) 8 euro balio du. Helduentzako menuak, berriz, 12 euro balio du. Helduen menuan entsalada, gisatua, postrea, kafea, ardoa, sagardoa eta ura egongo dira.
Korrika heldu bitarteko gainontzeko ekitaldien berri ere eman dute. Apirilaren 4an eta 11n, 16:30etik 18:00etara, Gainzuri ikastetxeko guraso batzordekoek petoak, txapak eta bazkarirako txartelak salduko dituzte Jose Mari Lasa plazan.
Apirilaren 10ean, berriz, Gure oroitzapenak filma emango dute Zelai Arizti aretoan. Emanaldia 19:00etan izango da. Apirilaren 12an Korrika Txikia egingo dute. 11:00etan izango da. 19:00etatik aurrera, berriz, Bertso-Korrika egingo dute. Bertsolariek herriko tabernetan abestuko dute. Egun horretako ekitaldiekin bukatzeko, 22:30ean KoP/Klika bertso desafioa egingo dute gaztetxean.
Korrika 21 Garestik abiatuko da apirilaren 4an eta Gasteizen amaituko da apirilaren 14an. Zumarragatik eta Urretxutik helmugara heldu aurreko egunean pasako da, beraz.
