Urola futbol taldearen gizonezkoen lehen taldea Ohorezko Erregional Mailara igoko da larunbatean Aloña Mendiri irabazten badio. Ez da partida erraza izango, oñatiarrek ere igotzeko aukera baitute partida ira-
baziz gero.
Partida berdinduz gero ere, Urolak igotzeko aukera handiak ditu. Izan ere, bigarren sailkatuak, Azpeitiko Lagun Onak taldeak, bederatzi goleko aldea lortu beharko luke Urola sailkapenean gainditzeko. Lagun Onak taldeak etxetik kanpo jokatuko du, baina sailkapeneko azkenaren aurka. Lazkaoren aurka, hain zuzen ere. Lazkaotarrek 67 gol jaso dituzte 29 partidatan.
Partida galtzen badu, berriz, promozio partida jokatzeko aukera du. Horretarako, Lagun Onak taldeak galdu edo berdindu egin behar du edo Urolak gol bakarreko aldeagatik galdu.
Larunbatekoa oso partida garrantzitsua da eta Urolak 100 sarrera erosi ditu bazkideen artean banatzeko. Gaur eta bihar banatuko ditu (gaur 18:00etatik 19:00etara eta bihar 18:00etatik 20:00etara), Argixao zelaira bazkide txartel batekin joaten diren herritarren artean. Bazkide txartel bakoitzeko bi sarrera banatuko dituzte. Gainera, Zumarragako Udalak autobusa jarriko du, doan, Oñatira joateko. Autobusa 16:30ean irtengo da, Correosetik. Sarrera guztiak banatzen ez badira, ostiralean zozketa egingo dute Hirukia tabernan. Zozketa 20:00etan izango da.
Ohorezko Erregional Mailara igotzen badira, ez dute ongi etorri ekitaldirik egingo. Ospakizuna herriko tabernaren batean egingo dute, zaleekin.
Josu Zubia Urola taldeko entrenatzailea baikor ageri da. «Oso denboraldi erregularra egin dugu, baina futbolean detaileak garrantzitsuak dira eta puntu batzuk modu inozoan galdu ditugu. Hori dela eta, igoera azken jardunaldian jokatuko dugu. Partida zaila izango da, baina azken jardunaldietan bezain ondo jokatuz gero, irabazteko aukera dugu», azaldu du Zubiak.
Oso giro polita egongo dela aurreratu du. «Oñatin jende asko joaten da futbol zelaira eta oso giro polita egongo da. Futbola gustatzen zaionarentzat, bikaina. Etxean jokatu nahiko genuke, baina lasaitasuna mantentzeko gai bagara, lan ona egingo dugu», amaitu du.
