Markel Olano EAJren ahaldun nagusi hautagaia Zumarragan egon da gaur, Josu Idigoras alkategaiarekin eta bere zerrendako hainbat kiderekin. Olanok herritik igarotzen den GI-2632 errepideari (Euskal Herria hiribidea) buruz hausnartu beharra dagoela esan du. “Deskargako autobide berria ireki ostean, bere funtzioa aldatu egin da. Zumarraga bitan zatitzen du eta kontu horri irtenbidea eman behar zaio”. Udalarekin elkarlanean aritzeko prest agertu da. “Gai hau funtsezkoa da Zumarragak aurrera egin dezan”. Horretarako, EAJ prozesu parte hartzaile bat martxan jartzearen alde azaldu da.
