Bihar eta etzi (larunbatean eta igandean) Kale Gorrian musika jaialdia egingo dute Urretxuko Santa Barbaran. Eguraldi bikaina iragarri dute eta antolatzaileek akanpatzeko gunea prestatu dute, kanpin dendarekin, furgonetarekin edo autokarabanarekin gaua pasatzera gelditu nahi dutenentzat. Gainera, Santa Barbarako taberna zabalik egongo da.
Nizuri Tazuneri rap eta trap taldeak emango dio hasiera jaialdiari. Kontzertua bihar izango da, 20:00etan. «Orain arte ez dugu rap edo trap talderik ekarri eta aurten horietako baten bila joan gara. Nizuri Tazuneri rapa eta trapa euskaraz egiten duten taldeen artean interesgarrienetakoa da», aipatu du Kale Gorrian kolektiboko Aritz Ormazabalek.
22:30ean Moxalek joko du. «Hannot Mintegiaren proiektu pertsonala da. Mintegia Audience taldeko gitarra jotzailea izan zen. Diskoaren grabaketan Mursegok parte hartu du, besteak beste».
Gauerdian Vulk taldeak joko du. «Bilboko post-punk talde bat da. Oso gazteak dira. Indartsuak eta freskoak. Agertokia jaten dute. Joy Division taldearen bertsio berritua direla esan daiteke. Abesti batzuk euskaraz abesten dituzte».
Larunbateko festa Entrepeneur DJ-aren saioarekin bukatuko da. «Jon Urtzelai herritarraren proiektua da. Proiekzio handiko gaztea da».
Gaua asko luzatuko denez, igande goizean lasai lo egiten utziko diete kanpin denda, furgoneta eta autokarabanetakoei. Igandeko lehen kontzertua 13:00etan izango da. Peru Galbetek eta Txakur Gorria kolektiboko neskek H-Artzetik ikuskizuna eskainiko dute. Ikuskizun honen helburua Joxan Artzeren poesia jendeari gerturatzea da. Horretarako, ikus-entzunezkoak erabiltzen dituzte eta zuzenean margotzen dute.
Txakur Gorria kolektiboa Malen Amenabarrek, Nerea Ibartzabalek, Ane Labakak eta Mariñe Arbeo zumarragarrak osatzen dute. Durangoko Azokako kartela eta Pirritx, Porrotx eta Marimototsen CDaren diseinua, posterra eta bideoklipa egin dituzte, besteak beste. Beraien lanetan hitza eta irudia uztartzen dituzte.
Peru Galbeterekin eskainiko duten ikuskizunaren ondoren, 14:00etatik 18:00etara, haurrentzako tailer bat egongo da. Bukatzeko, 18:00etan, Flavio Banterlak kontzertua egingo du. Italiar hau Urretxu eta Zumarragako Secundino Esnaola musika eskolako irakaslea da eta iaz Mystic Pop diskoa argitaratu zuen. Izatearen inguruan abesten du eta pop musika jotzen du, orkestra eta musika elektroniko ukituarekin.
Ormazabalek gonbita luzatu dio mundu guztiari. «Akanpada guneari esker, asteburu bikaina pasa daiteke autoa mugitu beharrik gabe», amaitu du Kale Gorrian kolektiboko kideak.
