Zumarragako Udalak Zumerk egitasmoko ikastaroan parte hartu duten bizilagunei diplomak eman dizkie. Ikastaro honen helburua negozio bat martxan jartzeko asmoa duten ekintzaileek laguntzea izan da. Ikastaroa amaitu duten hamabi pertsonetatik bostek pauso hori eman behar dute jada.
Egitasmoaren aurrekontua 120.000 eurokoa izan da eta diruaren %60 Eusko Jaurlaritzak jarri du. Udala langabetu guztiekin harremanetan jartzen saiatu zen. 525etik, 484rekin hitz egin zuten. 40 ekintzaile izateko prest agertu zen eta horietatik 15ek ikastaroan parte hartu dute. 12k amaitu dute.
Aipatu bezala, bostek denda bana irekiko dute: Eneritz Arrondo (gourmet janari-denda), Ana Maria Gonzalez (iturgintza zerbitzuak), Juana Lopez (ezkontzen antolaketa), Ana Maria Lopez (gozoki-denda) eta Christian Lopez (segurtasunarekin lotutako mugikor aplikazioak). Beste bi lagun bideragarritasun plana egiten ari dira: Marimar Olea (saloi dantzak egiteko artikuluak) eta Laura Compains (argazkigintza estudioa). Ikastaroa amaitu duten beste bost lagunak Elisabet Aranburu, Leire Aranzadi, Mertxe Hernando, Mari Carmen Murua eta Alazne Zaldua dira.
