Atzo eguerdian bularreko minbizia dutenen aldeko ekitaldia egin zuten geltokietako plazan, bertako merkatari eta ostalariek antolatuta. Sardina-jana egon zen eta Patxi Luke antzuolarrak zuzenean jo zuen. Sardina salmentatik lortutako dirua Katxalin elkarteari emango diote. Horretaz gain, Katxalin elkartearen Gabonetako loteria saldu zuten. Loteriak 3 euro balio du eta 0,5 euro ikerketarako dira. Txindoki eta Muga tabernetan, Urki liburu-dendan eta Andere ile-apaindegian eskura daiteke. Igande honetan Donostian egingo duten martxarako kamisetak eta Katxalineko emakumeek minbizia duten haurrentzat egiten dituzten panpinak erosteko aukera ere egon zen.
