Gainzuri ikastetxeko ikasleek urtero egutegi bat egiten dute eta 2020koa Iparragirreri eta bere emazte Anjela Kerexetari buruzkoa da. Izan ere, datorren urtean urretxuarrek Iparragirreren jaiotzaren 200. urteurrena ospatuko dute. Iparragirre 2020 egitasmoko partaidea da Gainzuri eta, egutegia egiteaz gain, Euskal Herriko haur abesbatzen jaialdiak antolatu ditu.
Ikasturtea hasi zutenetik, ikasleek Urretxuko olerkariaren eta bere emaztearen biografiak, garai hartako bizimodua, ohiturak… landu dituzte. Gainera, ziklo bakoitzak hiru abesti landu ditu. Kanta bakoitzari kontakizuna eta irudia gehitu dizkiote. Proiektuaren azken xedea artelana eta testu idatzia uztartzen dituen produktua aurkeztea da.
Irailetik gaurdaino egindako lana Juan de Lizarazu aretoan ikusgai jarri dute. Lanak hilaren 15era arte egongo dira ikusgai, 17:00etatik 20:00etara.
Gainzurik Hego eta Ipar Euskal Herriko ikastetxe publikoetako haur abesbatzen jaialdiak ere antolatu ditu. Intxaurrondoko, Hendaiako, Donibane Garaziko eta Baigorriko ikastetxeetako 150 haurrek parte hartuko dute. Iparragirreren kantak abestuko dituzte, aktore eta dantzari profesionalek lagunduta. Urretxuko kontzertua martxoaren 29an izango da: 17:30ean Ederrena pilotalekuan. Donostian eta Baigorrin ere abestuko dute.
