Aurten Golden dantzalekuaren irekieraren 50. urteurrena bete da. Herritar askok Goldenekin lotutako oroitzapenak dituzte eta larunbatean dantzalekuaren urteurrena ospatu zuten Zumarragako Muga tabernan. Izan ere, tabernako nagusia ere, Amancio Santos zumarragarra, Goldeneko bezeroa izan zen.
Larunbateko festan jende askok parte hartu zuen. Gehienak 40 urtetik gorakoak. 1970eko, 1980ko eta 1990eko musikarekin dantza egin zuten.
Golden Jose Migel Ormazabal eta Gregoria Otaegik ireki zuten. Berain seme-alabek eta horien bikoteek ere dantzalekuan lan egin zuten. Ormazbal eta Otaegi zegamarrak ziren eta dantzalekua ireki aurretik Isabel tabernako nagusiak izan ziren.
Dantzalekuak arrakasta handia izan zuen hasiera-hasieratik. Izan ere, jendea ez zegoen horren lokal handietara ohituta eta, gainera, punta-puntako musikariak ekarri zituzten. Goierriko makina bat bikote Goldenen ezagutu ziren. 1997an negozioa Antton Galdos oñatiarrari pasa zioten. Ordurako dantzalekuak gainbeheran zeuden. Golden 2013an itxi zen.
