Maialen Agirrek (Zumarraga, 1996) Kutxa Fundazioaren Ikasketa Amaierako Saria jaso du. Irailetik Ibarmia makina erreminta enpresan lan egiten du, Berrikuntza sailean.
Beti ikasle ona izan al zara?
Bai. Batxilergoa ohorezko matrikularekin bukatu nuen. Karreran, zailagoa izanik, nota okerragoak lortuko nituela uste nuen, baina oso emaitza onak lortu ditut.
Ikastea asko gustatzen al zaizu?
Bai. Esfortzuak emaitza onak ematen dituela ikusten duzunean, errazagoa da. Egia esan, oso antolatua naiz. Nota onak lortzeko zenbat ikasi behar den oso ondo neurtzen dut. Langilea naiz. Esfortzua eta eguneroko lana dira gakoa. Ez dago Albert Einstein izan beharrik nota onak lortzeko.
Sakrifizio handia izan al da?
Futbolean jokatzen dut, Goierri Gorri taldean. Astero hiru entrenamendu ditugu eta astebururo partida bat jokatzen dugu. Euskal Ligan jokatzen dugu eta partida horietako asko Gipuzkoatik kanpo dira. Baina ez nituen futbola eta lagunak ikasketengatik alde batera utzi nahi. Azken finean, zoriontasuna pertsonek ematen dizute. Ikasketak oso garrantzitsuak dira, baina jendearekin egon beharra duzu. Futbolean jarraitzeak eta lagunekin eta senitartekoekin egoteak poza eta ikasteko indarra eman dizkidate. Ez da sakrifizioa izan. Oso zoriontsua izan naiz.
Zenbat ordu eskaini dizkiezu ikasketei?
2014an Industria Diseinu Ingeniaritza ikasketak hasi nituen eta Mekanika ere gustatzen zitzaidala konturatu nintzen. Irakasle batek biak egitea proposatu zidan. Hala, bi karrerak egin nituen: Diseinua eta Mekanika. Goizetan baten ikasgaiak nituen eta arratsaldeetan bestearenak. 09:00etan sartzen nintzen unibertsitatera eta entrenamendua nuenean entrenamendurako irteten nintzen. Entrenamendurik ez nuenean, 09:00etatik 20:00etara unibertsitatean egoten nintzen. Lehen hiru urteetan Hernanin jokatu nuen.
Asteburuetan ere ikasten al zenuen?
Asteburuetan Zumarragara itzultzen nintzen eta beti aurkitzen nuen tarteren bat lagunekin egoteko. Dena den, asteburuetan ere ordu asko eskaintzen nizkien ikasketei. Inoiz ez nintzen goiz jaiki edo berandu oheratu, baina egunero ikasten nuen. Larunbatetan 09:00etan jaikitzen nintzen eta 14:00ak arte ikasten nuen. Arratsaldean futbol partida jokatzen nuen eta ondoren lagunekin irteten nintzen. Gauetan ere pixka bat ateratzen nintzen, azterketa garaia ez bazen. Igandetan 11:00etatik 21:00etara ikasten nuen. Jateko eta atseden hartzeko geldialdiak egiten nituen, noski.
Zer zioten gurasoek eta lagunek?
Ez nuen nire notei buruz hitz egiteko ohiturarik. Lagunek bazekiten Batxilergoan ohorezko matrikula lortu nuela eta kito. Unibertsitateko noten berri gurasoei bakarrik ematen nien, poza ematen baitzien. Lagunak eta taldekideak harrituta gelditu dira Kutxa Fundazioak saria eman didala jakin dutenean. Nondik atera duzu denbora?, galdetu didate. Denek zoriondu egin didate eta horrek asko poztu nau.
Argi zenuen zein karrera egin?
Ez nuen oso argi. Banekien zientzietako karrera bat egingo nuela eta Batxilergoan fisika, kimika, matematika eta marrazketa teknikoa hartu nituen. Argi nuen ez nituela Biologia eta Medikuntza ikasiko. Matematika edo Kimika nituen buruan. Ingeniaritza ere kontuan izatea aholkatu zidaten eta Ingeniaritzari buruzko informazioa eskuratu nuen. Hautatu nituen lau ikasgaiak biltzen zituela ikusi nuen eta Ingeniaritza ikastea erabaki nuen.
Aurkitu zenuena gustatu zitzaizula dirudi.
Hala da. Berehala konturatu nintzen asmatu egin nuela.
Azkoitiko Ibarmia enpresan egin zenituen ikasketa amaierako proiektuak.
Bi karrera egin nituenez, bi proiektu egin nituen. Hirugarren ikasturtearen amaieran praktikak egin nahi nituen eta Tecnum-en Enplegu Forora jo nuen. Bertan enpresa askok parte hartzen dute eta nire curriculuma eman nien. Enpresa askok ez dituzte ikasleak hartzen udan praktikak egiteko, bi hilabete oso epe laburra baita. Nire harridurarako, enpresa askok deitu zidaten. Praktikak Etxetar makina erreminta enpresan egin nituen. Makina erreminta mundua asko gustatzen zitzaidala ikusi nuen. Hori dela eta, Diseinu karrerako. proiektua arlo horretako enpresa batean egitea erabaki nuen. Ibarmiaren filosofia asko gustatu zitzaidan eta, irakasle baten laguntzarekin, proiektua bertan egitea lortu nuen. Elkarrekin gustura lan egin genuenez, Mekanikako proiektua ere bertan egin nuen. Horrek ere emaitza ona lortu zuen. Hala, irailetik Ibarmiako Berrikuntza sailean lan egiten dut.
Non ikusten duzu zure burua etorkizunean?
Oso gustura nago. Oraingoz ikasten jarraitu nahi dut. Ibarmian asko ari naiz ikasten. Denboraldi bat kanpoan emateari ez diot uko egiten, baina ez da nire ametsa. Ibarmiak berak atzerrian lan egiteko aukera eskaintzen du. Oso saltsera naiz eta gauza berriak probatzea gustatzen zait.
Futbolean jarraitzen al duzu?
Bai. Umetatik jokatu dut futbolean. Umetan Urolan eman nuen izena. Unibertsitatean hasi arte, Urolan jokatu nuen. Oso gustura. Ondoren, Hernanira joan nintzen. Bertan oso lagun onak egin nituen. Ondoren Goierri Gorrira etorri nintzen eta hemen ere oso gustura nago. Karrera hasi aurretik Realarekin entrenatu nuen, baina ikasketek lehentasuna zuten. Futbola asko gustatzen zait, baina gehien gustatzen zaidana taldeko giroa da.
