Gipuzkoako minbiziaren aurkako elkarteak mintzodromoak antolatu ditu, minbiziaren aurkako eguna dela eta. Horietako bat Zumarragan izango da.
Gipuzkoako minbiziaren aurkako elkarteak herritar guztiak parte hartzera animatu ditu: prozesu onkologikoa ezagutzen dutenak eta ezagutzen ez dutenak. Bost laguneko taldeak egingo dira eta taldeetan minbiziaren aurrean gizarteak dituen erronkei buruz hitz egingo dute. Ekarpenak egiteko, elkarrizketaren garapena zehaztuko duen gidoi baten laguntza izango dute.
Amaitu ostean, ekarpenak dokumentu batean jasoko dira eta minbiziaren aurkako elkarteak etorkizunean egingo diren ekintzak antolatzeko orduan kontuan izango ditu. Helburua minbiziaren sozializazioa eta normalizazioa bultzatzea da.
Gipuzkoako minbiziaren aurkako elkartearen lehen mintzodromoa da. Gaur Donostian, Tolosan eta Eibarren egin dute eta bihar (asteazkena) Zumarragako Zelai Arizti kultur etxean egingo dute. Zumarragako mintzodromoa 10:30etik 12:30era izango da.
Maider Sierra elkarteko kideak herritarrak parte hartzera animatu ditu. «Oso esperientzia aberasgarria izan daiteke».
