Igandean UZ Trail lasterketa egingo dute Urretxu eta Zumarragako mendietan. Korrikalariak 09:45ean abiatuko dira, Areizaga-Kalebarren plazatik. Inoiz baino korrikalari gehiagok parte hartuko dute: 350 inguruk.
Parte hartzaileek bi ibilbide izango dituzte aukeran: 12,1 kilometrokoa eta 23,4 kilometrokoa. Ibilbide motzekoak Belokitik eta Izazpitik pasako dira eta luzekoak Irimotik ere bai.
Parte hartu nahi dutenek kronoak.com webgunean eman dezakete izena. Gaur da horretarako azken eguna.
Lasterketa hau Goierri Kopa Trailerako puntuagarria da. Orain arte lasterketa bakarra egin da: Beasaingo Garin auzokoa. Urtarrilaren 19an egin zuten. Distantzia motzekoa izan zen eta Iñaki Olano altzotarra eta Irati Larrañaga usurbildarra nagusitu ziren.
Martxoaren 14an Arriarango mendi lasterketa egingo da, apirilaren 4an Gabiriakoa, maiatzaren 9an Segura eta Zeraingoa, maiatzaren 16an Txindokiko kilometro bertikala, ekainaren 20an Zaldibiakoa, irailaren 13an Idiazabalgoa eta urriaren 18an Ordiziakoa.
