Mikel Serrano alkateak, alderdietako ordezkariek eta Ramon Iturriotz udaltzainburuak prentsaurrekoa egin dute koronabirusaren inguruan hartutako erabakien berri emateko.
Herritarren babesari lehentasuna emango diote. Batez ere adinekoen babesari. Etxeko Laguntza Zerbitzuko langileen babesa bermatuko dute, bakarrik bizi diren adinekoei bazkaria eta afaria eramango diete, eguneko zentroetara joateari uzten dietenei eta bakardade egoeran bizi direnei jarraipena egingo diete, Eitzako boluntario taldearekin harremanetan jarriko dira lana koordinatzeko eta segurtasunez lan egiteko eta etxebizitzarik ez dutenei laguntzen saiatuko dira.
Bestalde, udalak merkatariei, enpresariei eta autonomoei laguntzeko modua aztertuko du. Ikastaroetan izena eman zutenek eta kiroldegiko erabiltzaileek ez dute kuotarik ordainduko.
Garbiketari dagokionez, kaleak eta igogailuak koronabirusari aurre egiteko produktuekin garbituko dira.
Horretaz gain, TAO guneak bertan behera utzi dituzte eta zama lanetarako ordutegia eguneko 24 orduetara zabaldu da, premiazko zerbitzuak ematen dituzten establezimenduen hornidura bermatzeko.
