Aste honetako Zumarragako azoka ostiralean (bihar) egingo dute larunbatean (etzi) egin beharrean. Larunbatean San Inazio eguna da: jai eguna, beraz.
Azoka ostiralez egingo da, baina ohiko moduan: Euskadi plazan elikagai saltzaileen postuak egongo dira eta La Salle-Legazpi ikastetxeko patioan arropa saltzaileen postuak.
Ordutegia ere ohikoa izango da. Plazako postuak 08:30etik 13:30era egongo dira zabalik eta La Salle-Legazpi ikastetxeko patiokoak 09:00etatik 14:00etara.
Dena den, ohi baino postu gutxiago egongo dira. Izan ere, saltzaile batzuk beste herri batzuetako azoketan lan egiten dute ostiraletan.
Azokara gerturatzerik ez duten erosleek, Klik eta Jaso zerbitzua erabili dezakete: saltzailearekin harremanetan jarri, eskaera egin eta erositako produktuak plazako sarreran dagoen takilan jaso (nahi duten orduan). Azokako saltzaileen kontaktuak zumarragakoazoka.eus webgunean daude.
