Kadete mailako taldeak joan zen astean hasi zuen denboraldia eta senior mailakoak datorren astean hasiko du .Herriko neskak boleibolean jokatzera animatu dituzte
![](https://www.otamotz.eus/site/files/2021/10/goierriren_boleibol_taldea-900x600.jpg)
Goierri kirol elkartearen boleibol sailak bi talde izango ditu 2021-2022 denboraldian: senior mailakoa eta kadete mailakoa. Azken hau berria da.
Boleibol saila duela urte gutxi sortu zen eta pixkanaka hazten ari da. Geroz eta gehiago dira kirol hau egiten duten Urretxuko eta Zumarragako neskak.
Hala, kadete mailako taldea eratu dute. Senior mailako taldea, berriz, 17 eta 33 urte bitarteko neskek osatzen dute. Aurtengo denboraldia iazkoa baino lasaiagoa izatea espero dute. «Aurreko denboraldia oso nahasgarria izan zen. Ezin izan genuen behar bezala entrenatu eta liga martxan jartzea lortu zen arren, murrizketa berriak medio, ezin izan genuen bukatu», aipatu du Anne Zufiaur Goierri kirol elkartearen boleibol saileko delegatuak.
Bi taldeentzat oso berezia izango da 2021-2022 denboraldia. Kadete mailako neskentzat lehenengoz lehiatuko direlako eta senior mailako neskentzat arerio berriak izango dituztelako. Horien artean, mutilez osatutako talderen bat. Ligak bi fase izango ditu: opena (azaroan eta abenduan) eta ofiziala (Euskal Ligara igotzeko partidak). Liga ofiziala urtarrilean edo otsailean hasiko da.
Delegatua, pozik
Zufiaur pozik ageri da. «Bi taldeek Gipuzkoa mailan jokatuko dute. Seniorrak Euskal Ligara igotzeko jokatuko du. Orain arte gazteek eta senior mailakoek elkarrekin jokatu dute, baina gazte mailako talde berri asko daude eta, hala, aurten ez dute elkarrekin jokatuko: gazte mailakoek beraien liga dute eta seniorrek berea. Zoritxarrez, guk aurten ez dugu gazte mailako talderik», aipatu du.
Kadete mailakoa, bai, ordea. «Kadete mailako taldearen sorrerak asko poztu gaitu. Neska batzuk galdezka etorri ziren eta, azkenean, animatu egin ziren. 14 fitxa eduki ditzakegu eta 14 etorri dira. Gainera, oso giro ona dute».
Joan zen astean hasi zuten denboraldia. «Txingudi taldearen aurka jokatu zuten, Irunen. Irabazten joan ziren, baina partidaren amaieran behera egin zuten».
Senior mailako taldearen dagokionez, azaroaren 6an hasiko du denboraldia. Hernaniko taldearen aurka jokatuko du. «Joan zen asteburuan lagunarteko partida bat jokatu behar genuen Aldirin, baina aurkariak ez ziren etorri koronabirus kasu bat izan zutelako. Herritar guztiak bi taldeen partidak ikustera animatu nahi ditut».
Eta boleibolean jokatzera, noski. «Boleibol taldean nahi duten guztiek joka dezakete. Izena emateko edo gurekin harremanetan jartzeko, Boleibol taldearen webgunera jo behar da».