Larunbatean, 10:30etik aurrera, Urretxuko Gabon Kopa pilota txapelketako finalak jokatuko dira Ederrena pilotalekuan
Gabon Kopa pilota txapelketa Gabonetako sinbolo bat dagoeneko Urretxun. Olentzero, Errege Magoak, Jesus haurra, argiak, mahatsa, opariak edo Gabon kantak bezainbeste. Gehienetan, txapelketa horren finalek ematen diete amaiera Gabonei. Aurtengo txapelketako finalak larunbat honetan jokatuko dira, Ederrena pilotalekuan.
Gabon Kopa txapelketa Goierri kirol elkartearen pilota sailak antolatzen du. Aurten, Ezkio, Legazpi, Urretxu eta Zumarragako pilota eskoletako aurrebenjamin, benjamin eta kimu mailetako pilotariek parte hartu dute. Baita beraien ibilbidea Goierri pilota eskolan hasi eta egun beste klub batzuetan jokatzen duten gazte mailako pilotariek ere. Guztira 70 haur eta gaztek baino gehiagok parte hartu dute.
Gabon Kopa txapelketa abenduaren 18an hasi zen. Kanporaketak abenduaren 18an, 19an, 26an, 29an eta 30ean jokatu ziren. Larunbateko lehen partida aurrebenjamin mailako B finala izango da. Muruak eta Saralegik, Arnaiz eta Madinaren aurka jokatuko dute. Laurak Goierrikoak dira.
Benjamin mailako B finalean, Ur, Alai eta Oinatzek, Eñaut, Ager eta Aierten kontra jokatuko dute. Sei pilotariak legazpiarrak dira.
Kimu mailako B finaleko lau pilotariak ere legazpiarrak dira: Egoitzek eta Urkok, Oñatzen, Suharren eta Markoren aurka jokatuko dute. Ondoren, Beloki pilota eskolako lau pilotarik aurrebenjamin mailako A finala jokatuko dute: Erostarbek eta Retak, Ormaetxearekin eta Ruizekin neurtuko dituzte indarrak. Benjamin mailako A finalean, berriz, Mendizabalek eta Cruzek, Chefraden eta Asurabarrenaren aurka jokatuko dute. Lauak Goierri klubekoak dira.
Kimu mailako A finalean, Ezkioko Manteconek eta Mendizabalek, Goierriko Garmendiaren eta Abarrategiren aurka jokatuko dute. Bukatzeko, gazte mailako finalean, Gorostidik eta Plazaolak, Etxanizen eta Izagirreren aurka jokatuko dute. Bi lehenengoak Zazpi Iturri klubekoak dira, Etxaniz Azkoitiko klubekoa eta Izagirre Tolosako klubekoa.
Partida guztiak amaitutakoan, sari banaketa ekitaldia egongo da. Antolatzaileek herritar guztiak larunbat goizeko pilota jaialdiaz gozatzera gonbidatu dituzte.
